स्वच्छ सर्वेक्षण ग्रामीण म ईस्ट जोन म छत्तीसगढ़ टॉप म, आने-आने श्रेणी म चार राष्ट्रीय पुरस्कार मिलिस

अंजोर. रायपुर। स्वच्छता के क्षेत्र म जबर बुता म छत्तीसगढ़ के डंका देशभर म बजत हावय। स्वच्छ सर्वेक्षण  ग्रामीण म तको चार पुरस्कार छत्तीसगढ़ ल दिये गे हावय। टॉप परफार्मिंग राज्य के रूप म छत्तीसगढ़ ह ईस्ट जोन म बाजी मारे हावय। येकर संग 3 आन कैटेगरी म तको छत्तीसगढ़ के राष्ट्रीय पुरस्कार मिले  हावय। गांधी जयंती म आयोजित स्वच्छ भारत दिवस 2022 कार्यक्रम म राष्ट्रपति द्रौपदी मुर्मु ह नवा दिल्ली के विज्ञान भवन म आयोजित पुरस्कार समारोह म छत्तीसगढ़ ल पुरस्कृत करिन हावय।

पेयजल अउ स्वच्छता विभाग, जलशक्ति मंत्रालय 

पेयजल अउ स्वच्छता विभाग, जलशक्ति मंत्रालय के डहर ले स्वच्छ भारत मिशन (ग्रामीण) सर्वेक्षण म छत्तीसगढ़ ह ईस्ट जोन म बाजी मारे हावय। वहीं, ईस्ट जोन म सबले बढि़या प्रदर्शन करे वाला जिला  म दुर्ग अउ बालोद ह क्रमश: दूसरा अउ तीसरा ठऊर  पाये हावय। येकर संग ही ओडीएफ प्लस म दीवार लेखन प्रतियोगिता म सेंट्रल ज़ोन म छत्तीसगढ़ के तीसरा ठऊर  मिले हावय।

विज्ञान भवन म आयोजित कार्यक्रम म ए मउका म केंद्रीय जल शक्ति मंत्री गजेंद्र सिंह शेखावत, केंद्रीय ग्रामीण विकास अउ पंचायत राज मंत्री गिरिराज सिंह, जल शक्ति राज्यमंत्री प्रह्लाद सिंह पटेल, जल शक्ति अउ आदिवासी बुता राज्यमंत्री बिशेस्वर टुडू उपस्थित रिहिन। येकर संग ही छत्तीसगढ़ ले सचिव, प्रसन्ना आर, स्वच्छ भारत मिशन के संचालक संजय अग्रवाल, सत्य नारायण राठौर, जल जीवन मिशन के  अधिकारी मन सहित जनप्रतिनिधि अउ आन अवार्डी सामिल रिहिन।