परसदा स्टेडियम म रोड सेफ्टी वर्ल्ड सीरीज क्रिकेट टूर्नामेंट रइही निःशुल्क

अंजोर.रायपुर। कलेक्टर डॉ.सर्वेश्वर नरेन्द्र भुरे अउ एस.एस.पी. प्रशांत अग्रवाल ह कलेक्टोरेट सभाकक्ष म जिला के कानून बेवस्था के समीक्षा करिस। ओमन आने वाला कार्यक्रम, त्योहार अउ आने-आने संगठन मन डहर ले धरना, विरोध प्रदर्शन अउ रैली उक के संबंध म  अधिकारी मनको निर्देशित करिन।

कलेक्टर ह किहिन के 27 सितंबर ले अंतर्राष्ट्रीय क्रिकेट स्टेडियम परसदा म रोड सेफ्टी वर्ल्ड सीरीज क्रिकेट टूर्नामेंट होना हावय। ए आयोजन म 27 सितंबर के दू मैच, 28 अउ 29 सितंबर के एक-एक अउ 1 अक्टूबर के फाइनल मैच खेले जाही। 27 सितंबर के पहिली पाली श्रीलंका अउ बंगलादेश के बीच अउ आन पाली म इंग्लैंड अउ आस्ट्रेलिया के बीच मैच खेले जाही। ए दिन के मैच सबो के खातिर निः शुल्क रइही। देखइया बिना टिकट के मैच देख सकत हावयं। ओमन बताइन के गेट क्रमांक 2, 3, 8, 9 अउ 10 म परिवार वाला देखइया ल प्रवेश दे जाही। येकर अलावा आन गेट ले बिना परिवार वाला देखइया प्रवेश कर सकत हावय।

कलेक्टर ह देखइया के सुविधा, पार्किग जगह म पर्याप्त लाईट उक के संग सुरक्षा व्यवस्था, पर्याप्त टिकट काउंटर, साफ-सफाई, चिकित्सा व्यवस्था, एंबुलेंस, फायर ब्रिगेड उक के संबंध म जानकारी लेके निर्देश दिस। कलेक्टर डॉ भुरे ह अवइया दिन म आयोजित होवइया दशहरा अउ ईद परब के संबंध म तको  अधिकारी मनले गोठबात करिस।  अधिकारी मन बताइन के रायपुर शहर के आने-आने क्षेत्र म दशहरा के 10 बड़े कार्यक्रम आयोजित करे जात हावय। कलेक्टर ह उन सबो जगह म मजिस्ट्रेट ड्यूटी लगाये के निर्देश दिस। ओमन नवरात्री परब अउ गरबा के आयोजन म तको गोठबात करत  निर्देशित करिन। ओमन किहिन के रतिहा 10 बजे के बाद डीजे बजाये म सख्ती बरते जाए। येकर अलावा सामान्य दिन म करार समय अउ ध्वनि सीमा के भीतर माननीय न्यायालय के दिशा निर्देश के कड़ाई ले पालन कराना सुनिश्चित करें।