अंजोर.धमतरी। राज्य शासन के मंशा मुताबिक अवइया 06 अक्टूबर ले छत्तीसगढ़ के पारंपरिक खेल गतिविधी ल बढ़ावा दे छत्तीसगढ़िया ओलंपिक 2022-23 के आयोजन करे जाना हावय। येकर देखत आज के समय सीमा के बइठक म कलेक्टर पी.एस.एल्मा ह खेल विभाग के जरूरी तइयारी करे के निर्देश दिस। संग ही ग्रामीण अउ नगरीय क्षेत्र म आयोजित होए वाला खेल के खातिर संबंधित अधिकारी मनला बेवस्था सुनिश्चित करे ल किहिन। जानबा होवय के छत्तीसगढ़िया ओलंपिक म छत्तीसगढ़ के पारंपरिक 14 खेल विधा मन म प्रतियोगिता आयोजित के जाही। ये खेल विधा मन म गिल्ली डंडा, पिट्टूल, संखली, लंगड़ी दौड़, कबड्डी, खो-खो, रस्साकसी, बाटी (कंचा), बिल्लस, फुगड़ी, गेड़ी दौड़, भंवरा, 100 मीटर दौड़ अउ लम्बी कूद के प्रतियोगिता तीन उमर वर्ग म आयोजित करना हावय। एमे 18 साल तक, 18 ले 40 अउ 40 साल ले जादा उमर के महिला अउ पुरूष भाग लेवइया हिस्सा ले सकही।
राजीव युवा मितान क्लब स्तर म 06 अक्टूबर ले 11 अक्टूबर तक पहिली स्तर के प्रतियोगिता आयोजित होही। येकर बाद जोन स्तर म 15 अक्टूबर ले 20 अक्टूबर तक, विकासखण्ड/नगरीय क्लस्टर स्तर म प्रतियोगिता 27 अक्टूबर ले 10 नवम्बर तक आयोजित के जाही। ज़िला म चौथा अउ आखरी स्तर जिला स्तर म 17 नवम्बर ले 26 नवम्बर तक आयोजित होही। येकर बाद इहां के विजेता संभाग स्तर म 05 दिसम्बर ले 14 दिसम्बर तक आयोजित छत्तीसगढ़िया ओलंपिक म भाग लेही। राज्य स्तर म छठवां स्तर के छत्तीसगढ़िया ओलंपिक 28 दिसम्बर 2022 ले 06 जनवरी 2023 तक खेले जाही। कलेक्टर ह ज़िले म आयोजित होए वाला छत्तीसगढ़िया ओलंपिक के प्रदेस के मुखिया भूपेश बघेल के मंशा के हिसाब ले पूरा उत्साह अउ उमंग के संग आयोजित करे अउ लोक खेल के खिलाड़ी के बढ़-चढ़कर सामिल करे प्रोत्साहित करे म जोर दे हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।