धान, चांवल, गेंहू अउ लौकी के बीजा ले बने राखी ले सजही भाई के कलाई

अंजोर.रायपुर। भाई-बहिनी के पवित्र रक्षाबंधन के तिहार इही महीना के 11 अगस्त के मनाये जाही। पावन पर्व रक्षा बंधन ल देखत कवर्धा जिला के बिहान के महिला स्वसहायता समूह ह भाइ के कलाइ म रक्षा बंधन सजाये के पूर तियारी कर डारे हावय। ए बार ओमन अपन डहर ले बनाए राखी ल ’भोर बंधन’ नाम दे हावय, भोरबंधन राखी के कीमत 20 रूपिया ले सुरू होके 35 ले 40 रूपिया तक हावय। भोर बंधन राखी के बिक्री के खातिर कबीरधाम जिला म सात अलग-अलग कांउटर तको बनाए गे हावय, जेमा कलेक्टोरेट परिसर, सी-मार्ट अउ जिला के सबो विकासखण्ड के जनपद पंचायत मुख्यालय म भोरबंधन ब्रांड के राखी उपलब्ध रइही।

ये राखी आकर्षक तो हावय संगे-संग येला बनाये खातिर धान, चांवल, गेहूं, लौकी के बीजी के उपयोग करे गे हावय जेकर ले ए पावन पर्व के महत्व अउ बढ़गे हावय। पहिली दिन महिला समूह के भोरबंधन राखी के अच्छा बिक्री होए के जानकारी मिले हावय।