हरेली तिहार ले मुख्यमंत्री भूपेश बघेल के ऐतिहासिक फइसला, गोबर के बाद गौमूत्र खरीदी करइया देश म पहिली राज्य छत्तीसगढ़

cow urine purchase scheme in chhattisgarh

अंजोर.रायपुर। प्रदेश के मुखिया दाऊ भूपेश बघेल अपन नवाचारी उदीम के सेती सदा खबर म बने रिथे अउ उंकर बुता के देश म ही बल्कि विदेश म तको सोर उड़त रिथे। एसो के हरेली तिहार ले अब गउठान मन म गौ मूत्र खरीदी के जबर फइसला भूपेश दाऊ कोति ले लिये गे हावय। गौमूत्र बेचके एक कोति पशुपालक मनके थइला म उपरा पइसा आही उंहे दूसर कोति गौठान समूह वाले मन गौमूत्र ले कीटनाशक बनाके मुनाफा कमाही।

गौमूत्र खरीदी के सुरूआज दाऊ जी खुदे गौमूत्र बेच के करिन। मिले आरो के मुताबिक मुख्यमंत्री भूपेश बघेल ह पहिली गौमूत्र बेचइया के रूप म निधि स्व सहायता समूह, चंदखुरी ल 5 लीटर गौमूत्र बेच के 20 रूपिया कमाइस तको। ये मउका म ओमन स्व सहायता समूह ल प्रोत्साहन राशि वितरण करके चिन्हित गौठान म गौमूत्र खरीदी करे बर गौमूत्र टेस्टिंग किट तको दीस।