छत्तीसगढ़ी फिलिम के दिग्गज निर्माता, निर्देशक, कलाकार ल सीएम भूपेश बघेल के हाथ ले मिलिस एबेलॉन सिने अवार्ड

रायपुर,23 जुलाई। छत्तीसगढ़ी सिनेमा ले जुड़े लोगन के खातिर सावन के महीना कई मायने म खास रिहिन, एक तनि सिनेमाघर म छत्तीसगढ़ी फिल्म के बाढ़ असान आये हावय, त दूसर तनि सिने अवार्ड के बौछार। सिनेमा म काम करइया कलाकार मन के जीवन म बहुत ही कम अइसे मउका आथे जब सबो ल एक ही मंच म सम्मानित होए के मउका मिलथे। अउ सौभाग्य ले मिले  ये सुन्हरा मउका कोनो गवाना नइ चाहत रिहिस। हाल ही म प्रदेस के मुख्यमंत्री भूपेश बघेल, संस्कृति मंत्री अमरजीत भगत, संसदीय सचिव विकास उपाध्याय, राज्य खाद्य आयोग के अध्यक्ष गुरप्रीत सिंह बाबरा के करकमल ले सबो कलाकार मन ला पहिली बार एक ही मंच म एबेलॉन सिने अवार्ड ले सम्मानित करे गिस।

राजधानी रायपुर के शहीद स्मारक भवन म फिल्ममेकर अउ अभिनेता राज साहू अउ उंकर टीम डहर ले आयोजित सम्मान समारोह म बड़का संख्या म छत्तीसगढ़ी सिनेमा ले जुड़े लोगन मौजूद रिहिस। ए मउका म मुख्य पहुना भूपेश बघेल के हाथ सबो कलाकार मन के सम्मानित करे गिस। छत्तीसगढ़ी फिल्म के भीष्म पितामह कहे जाये वाला मशहूर निर्माता, निर्देशक मोहन सुंदरानी गोल्ड मैडल अउ स्मृति चिनहा दे करके सम्मानित करे गिस। कार्यक्रम म बिसेस रूप ले छत्तीसगढ़ी सिनेमा ले जुड़े कलाकार, निर्माता, निर्देशक मनोज वर्मा, सतीश जैन, प्रकाश अवस्थी, करण खान, रजनीश झांझी, अशोक तिवारी, उपासना वैष्णव, उर्वशी साहू उक उपस्थित रिहिस।