अंजोर.पेंड्रा। छत्तीसगढ़ विधानसभा अध्यक्ष डॉ. चरणदास महंत ह नगर पंचायत पेंड्रा म हाई स्कूल स्वीमिंग पुल के आगू स्व. बिसाहू दास महंत के मूर्ति के अनावरण करिन। स्व. बिसाहू दास महंत कुशल राजनीतिज्ञ रिहिस, वो अविभाजित मध्यप्रदेश के पहिली मंत्रिमंडल म मंत्री रिहिन। स्व. बिसाहू दास महंत के 23 जुलाई के 44 वीं पुण्यतिथि म छत्तीसगढ़ विधानसभा अध्यक्ष डॉ. चरणदास महंत ह ओला सुरता करत होए भावभीनी श्रद्धांजलि अर्पित करके उंकर मूर्ति के अनावरण करिन।
लोकार्पण-भूमिपूजन
ए मउका म डॉ. महंत ह किहिन के हम बाबूजी के बताए रसता ल अनुसरण करत जनसेवा के बुता करत हावन। ओमन छत्तीसगढ़ी भाषा म संबोधित करत किहिन के हमर परिवार के संबंध सुरू ले ही पेंड्रा ले जुड़े हावय। ओमन बताइन के उंकर पिताजी स्व. बिसाहू दास महंत 1949-50 के बखत चांपा म देवांगन परिवार के इहां किराए म रहत रिहिस, जेन सेती वो कोसा उत्पादन अउ बेचे ले संबंधित समस्या ले अवगत रिहिस। ओमन चुनाव जीतने के बाद कोसा कपड़ा के व्यापार के बढ़ावा दे के उद्देश्य ले बुता करिन। डॉ. महंत ह किहिन के स्व. बिसाहू दास महंत बांगो डैम के स्वप्न दृष्टा रिहिस अउ बांगो डैम के बनाये के बाद ही कोरबा जिला म बिजली उत्पादन, जांजगीर-चांपा, रायगढ़ उक जिला म सिंचाई सुविधा बाढ़हे हावय। ओमन किहिन के राज्य सरकार नरवा गरवा घुरवा बाड़ी, गोबर, गोमूत्र खरीदी, पोषण आहार उक आन योजना मन के माध्यम ले प्रदेस के विकास करे के खातिर सरलग बुता करत हावय।
राजस्व मंत्री अउ जिला के प्रभारी मंत्री जयसिंह अग्रवाल ह किहिन के स्व. बिसाहू दास महंत आज तको क्षेत्रवासी मन के दिल म जीवित हावय। आज के दिन गौरेला पेंड्रा मरवाही जिला वासी के खातिर ऐतिहासिक दिन हावय। जिला म उंकर प्रतिमा के अनावरण करे गे हावय। ओमन किहिन के स्व. बिसाहू दास महंत के सेती ही कोरबा जिला म उद्योग धंधों के विकास होइस अउ उंकर प्रेरणा ले ही आज विधानसभा अध्यक्ष डॉ. चरणदास महंत अउ कोरबा सांसद श्रीमती ज्योत्सना महंत सहित हम सबो उंकर बताए रसता म चलके क्षेत्र के सरलग विकास करे के प्रयास करके रिहिन हावयं।
कोरबा सांसद श्रीमती ज्योत्सना चरणदास महंत ह किहिन के स्व. बिसाहू दास महंत राजनीति म बड़े नेता, मंत्री होए के बाद तको एक किसान के तरह, एक सामान्य मनखे के रकम ले जीवन व्यतीत करत रिहिस। ओमन सादगीपूर्ण, निःस्वार्थ भाव ले अपन पूरा जीवन जनसेवा म लगाये अउ जनता ह हमन ल उंकर अधूरे सपना के पूरा करे के मउका दे येकर खातिर ओमन जनता के आभार व्यक्त करिन। ओमन किहिन के कोनो तको इंसान के यदि कोनो मंच या मउका मिलत हावय त ओकर उद्देश्य जनसेवा होना चाही।
मरवाही विधायक डॉ. के.के. धु्रव ह किहिन के स्व. बिसाहू दास महंत ह केऊ सामाजिक बुता करे हावयं अउ उंकर डहर ले समाज के विकास के खातिर करे गे बुता हम सबो के खातिर अनुकरणीय हावय। कार्यक्रम के नगर पंचायत पेंड्रा अध्यक्ष राकेश जालान ह तको सम्बोधित करिन।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।