अंजोर. रायगढ़। पाछु करीब डेढ़ महीना ले जिला के रिहायशी इलाका के संग कॉलोनी म सुनियोजित तरीका ले अज्ञात चोर सूने मकान म चोरी ल अंजाम देवत। एक के बाद एक चोरी के बड़का घटना मन ल एसपी अभिषेक मीना गंभीरता ले लेवत सबो मामला के स्वयं समीक्षा करके एडिशनल एसपी लखन पटले के अगुवई म सीएसपी दीपक मिश्रा, साइबर सेल अउ जिला के आने-आने थाना के प्रभारी अउ स्टाफ के समिलहा टीम बनाये गिस जेला आने- आने जिम्मेदारी सउपिस गिस। एडिशनल एसपी अउ सीएसपी रायगढ़ के सुपरविजन म पुलिस टीम मामला के पतासाजी म जुटकर सबो चोरी के करीब 150-200 सीसीटीवी फुटेज खंगाले गिस जेमे कई संदिग्ध के फोटो तको मिलिस जेला मुखबिर अउ पहिली के चोरी, लूट म सामिल आरोपी मन के देखाके पहचान कराइन गिस।
लगभग 1 सप्ताह के अथक प्रयास म रायगढ़ पुलिस के टीम आरोपी मन के ठिकाना थाना कुमारगंज डिस्ट्रिक्ट दक्षिण दिनाजपुर पश्चिम बंगाल म रेड करे गिस जिहां एक महिला (छबिकुन नहर बिबी मण्डल) मिलिस। जेकर ले कड़ी पूछताछ म जानकारी होइस के आरोपीगण उड़ीसा अउ छत्तीसगढ़ के कई जिला म जाके रुकत हावयं अक्सर ये काम धंधे के ओखी अइसे ठऊर मन म रुकते हावयं जिहां आम लोगन के आना जाना कम हो, ये लोगन कबाड़ बीने फेरी करे, सफाई के काम, एसी सुधारे जइसे काम करके लोगन ल अपन परिचय दे रिहिस अउ मउका देखके चोरी के वारदात ल अंजाम दे रिहिन।
इंकर गिरोह के सरगना मोहम्मद खालिद हावय जेन अपन संगी के संग हर जिला म नवा वेशभूषा के संग रुकता अउ अपराध के अंजाम देत रिहिस। येकर टीम भारत-बांग्लादेश के आखरी सीमा म बसे गांव के अपन ठिकाना बनाके रखे रिहिस इहां वो ह चोरी के माल के बांग्लादेश अउ पश्चिम बंगाल के आने-आने जिला म खपात रिहिस। आरोपीगण चोरी के संपत्ति ले कई बहुमूल्य जमीन के खरीदी मकान के खरीदी के जानकारी पुलिस ल मिले हावय अउ ये अक्सर चोरी के गाड़ी के प्रयोग करे रिहिस। जूटमिल के पार्क सिटी म चोरी म तको आरोपी मन डहर ले जेन मोटरसाइकिल के उपयोग करे गे हावय पुलिस के जांच म उंकर पामगढ़ जिला जांजगीर चांपा क्षेत्र म चोरी के जानकारी मिले हावय आरोपी मन म तीन फरार हावयं जेकर पहचान पुलिस ल मिल चुके हावय। आन जिला के पुलिस ले जिला के पुलिस संपर्क म हावय जेकर लघियात धरपकड़ करे जाही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।