छत्तीसगढ़ म युवा मन खातिर होटल इंडस्ट्री म अपार संभावना : पर्यटन मंत्री ताम्रध्वज साहू

hotel management in Chhattisgarh Huge potential

रायपुर। प्रदेस के गृह अउ पर्यटन मंत्री ताम्रध्वज साहू ह नवा रायपुर के इंस्टीट्यूट ऑफ होटल मैनेजमेंट के पहिली वार्षिक समारोह ल सामिल होइन। संग म छत्तीसगढ़ पर्यटन मंडल के अध्यक्ष अटल श्रीवास्तव, पर्यटन मंडल के उपाध्यक्ष श्रीमती चित्ररेखा साहू, पर्यटन विभाग के सचिव अउ संस्थान के चेयरमैन अन्बलगन पी., छत्तीसगढ़ पर्यटन मंडल के प्रबंध संचालक अनिल कुमार साहू बतौर पहुना मौजूद रिहिस। ये मउका म ओमन किहिन के छत्तीसगढ़ म हमर सरकार बने के बाद मुख्यमंत्री भूपेश बघेल के अगुवई म राज्य सरकार प्रदेस के संस्कृति के बढ़ावा दे के खातिर सरलग अभिनव प्रयास करत हावय। मुख्यमंत्री श्री बघेल के अगुवई अउ मार्गदर्शन म छत्तीसगढ़ के कला, संस्कृति अउ पर्यटन के संग स्थानीय खान-पान के तको प्रोत्साहित करे जात हावय। अब त प्रदेस के बड़े होटल म तको छत्तीसगढ़ी व्यंजन ल मेनू म सामिल करे जात हावय, जेला लोगन पसंद तको करत हावयं। अइसे म छत्तीसगढ़ के युवा मन के खातिर होटल इंडस्ट्री म अपार संभावना हावयं।

इंस्टीट्यूट ऑफ होटल मैनेजमेंट

इंस्टीट्यूट ऑफ होटल मैनेजमेंट के पहिली वार्षिक समारोह के मउका म मुख्य पहुना के रूप म पहुंचे पर्यटन मंत्री ताम्रध्वज साहू ह किहिन के छत्तीसगढ़ म अब कई बड़े होटल्स आत हावयं। इहां ओला मानव संसाधन के जरूरत हावय। संग ही छत्तीसगढ़ी व्यंजन ल तको जेन रकम ले प्रोत्साहन मिलत हावय त स्थानीय युवा मन के खातिर रोजगार के मउका अउ तको बढ़त हावयं।

छत्तीसगढ़ पर्यटन विभाग के सचिव श्री अन्बलगन पी. ह बताइन के भविष्य म अंतराष्ट्रीय स्तर के मानक के मुताबिक पढ़ईया मन के पेशेवर रूप ले तइयार करे के खातिर सरलग प्रयास करे  जात हावयं। जरूरत के मुताबिक भविष्य म अधोसंरचना विकास म काम करे जाही। संग ही ओमन उम्मीद जताई के संस्थान के जल्दीभ ही स्थायी मान्यता मिल जाही। ए मउका म संस्थान के तनि ले प्राचार्य श्रीमती रेखा शुक्ला ह प्रतिवेदन पढ़ा अउ संस्थान के उपलब्धि के बताइन। समारोह के बखत संस्थान के वार्षिक स्मारिका “सुकवा” के तको विमोचन पहुना मन डहर ले करे गिस। उहें पढ़ईया मन ह आकर्षक सांस्कृतिक कार्यक्रम प्रस्तुत करे। उहें संस्थान म वर्षभर होवइया आने-आने गतिविधी के पढ़ईया मनला पुरस्कृत तको करे गिस।

पर्यटन मंडल के तनि ले पढ़ईया मनला मिलही मउका

कार्यक्रम के बखत पर्यटन मंत्री श्री साहू ह बताइन के छत्तीसगढ़ पर्यटन विभाग के तनि ले अवइया 9 ले 24 जुलाई तक छत्तीसगढ़ पर्यटन मंडल डहर ले राज्य के पर्यटन ल बढ़ावा दे के खातिर बिसेस आयोजन करे जात हावय। ए बखत पर्यटन मंडल के रिसॉर्ट म स्वागत, सत्कार अउ खान-पान के काम ल संभाले के खातिर इंस्टीट्यूट ऑफ होटल मैनेजमेंट रायपुर के पढ़ईया मनला मउका दे जाही। ये मउका पढ़ईया मन ना पेशेवर बने के खातिर एक अलग अनुभव होही।

मंच ले मिलिस प्लेसमेंट

समारोह के बखत रायगढ़ ले संस्थान म पढ़े बर आये फर्स्ट ईयर के पढ़इया लइका श्रीजना परिहार ल स्टूडेंट ऑफ द ईयर घोसित करे गिस। समारोह के बखत तको श्रीजना के पेशेवर अंदाज ल देखत पर्यटन मंडल के अध्यक्ष श्रीवास्तव ह मंच ले ही श्रीजना ल प्लेसमेंट ऑफर करिन। ओमन श्रीजना ल 75 हजार रूपिया प्रतिमाह के पैकेज म कान्हा नेशनल पार्क के थ्री स्टार होटल म अपाइंट करे के घोसना करिस।