ग्रामीण औद्योगिक पार्क ले गांधी जी के सुराज के सपना छत्तीसगढ़ म होवथे साकार

ग्रामीण औद्योगिक पार्क

गांधी जी के सुराज के सपना रिहिस आत्मनिर्भर अउ तेजी ले बाढ़त ग्रामीण औद्योगिक ईकाई। कांकेर जिला के पहिली ग्रामीण औद्योगिक पार्क, गांधी गांव कुलगांव ल देखके महसूस होवत हाबे के हम गांधी जी के सपना ल पूरा करे के दिशा म सफल होत हावयं। ये बात मुख्यमंत्री भूपेश बघेल ह गांधी गांव कुलगांव के लोकार्पण के मउका म कहिन। मुख्यमंत्री ह किहिन के गउठान के हमन रोजगार ठौर के रूप म विकसित करे के निर्देश दे रेहेन रिहिस ताकि बड़का ग्रामीण आबादी ल आने-आने रोजगारमूलक गतिविधी ले जोड़े जा सके। ये काम कतका उपयोगी हो सकत हावय अउ येकर ले लोगन के खातिर कोन बड़े पैमाना म आर्थिक मउका पैदा करे जा सकत हावयं गांधी गांव कुलगांव येकर सुंदर उदाहरण हावय।

ए मउका म मुख्यमंत्री ह महात्मा गांधी के प्रतिमा के माल्यार्पण करे के बाद केंद्र के निरीक्षण करिन। ओमन ढेंकी ले चाउंर निकालिस। मुख्यमंत्री ह किहिन के ये हमर सुंदर परंपरा हावय अउ येकर ले धान के गुणवत्ता तको सुरक्षित रिथे। ओमन आने-आने स्वसहायता समूह डहर ले करे जात रोजगारमूलक गतिविधी के निरीक्षण करिन।

ए मउका म विधानसभा उपाध्यक्ष श्री मनोज मंडावी, महिला अउ बाल विकास मंत्री श्रीमती अनिला भेंड़िया, संसदीय सचिव श्री शिशुपाल सोरी, मुख्यमंत्री के सलाहकार श्री राजेश तिवारी अउ आन जनप्रतिनिधि उपस्थित रिहिस।