राहुल गांधी देस के लोगन के साथ देवथे ए सेती ओला परेसान करे जावथे : श्री बघेल

bhupesh baghel rahul gandhi photos

दिल्ली । छत्तीसगढ़ के मुख्यमंत्री भूपेश बघेल ह सांसद राहुल गांधी के उपर होवत ED के कार्यवाही ल लेके बड़का बयान दे हावय। श्री बघेल ह अग्निवीर के विरोध अउ राहुल गांधी के समर्थन म सरलग दिल्ली म अपन सांसद अउ मंत्री मनके संग डटे हाबे। पाछू दिन उंकर गिरफ्तारी तको होए रिहिस। ओमन किहिन के राहुल गांधी जी देस के लोगन के संग हावय ये सेती ओला परेसान करे जात हावय। अऊ जेन मन भी राहुल के साथ हे ओहू मनला अब परेसान करे जावत हाबे।

छत्तीसगढ़ म भी फोन टेपिंग के ओरा मिलत हाबे..., तभो हमन नइ डर्रावन

श्री बघेल अग्निवीर योजना के जबर विरोध करत किहिन के ये योजना युवा मन खातिर बने नइये, चार साल नौकरी करे के बाद उंकर का होही? आन-आन राज्य मन कोति ले ओमन ला नौकरी दे के बात करत हाबे, फेर का ये सब अतका आसान होही। देस म पहिली ले ही बेरोजगारी हाबे, आरक्षण ल तको खतम करे खेल होवत हाबे। हम सब येकर जबर विरोध करबोन, राष्ट्रपति ले मिलबो, अपन बात रखबो। ओमन आगू किहिन के जेन राहुल गांधी के संग हाबे तेनो ल बेवजह परेसान करे जावथे। राजस्थान म अशोक गहलोत के भाई के इहां CBI भेजे गिस, छत्तीसगढ़ म भी फोन टेपिंग के ओरा मिलत हाबे। तभो हमन नइ डर्रावन।