 |
| Khelo India Youth Games |
रायपुर। मुख्यमंत्री भूपेश बघेल ह खेलो इंडिया यूथ गेम्स म छत्तीसगढ़ के पदक विजेता सहित भाग लेवइया खिलाड़ी ल बधाई अउ सुभकामना दीस। खेल के ए राष्ट्रीय मंच म छत्तीसगढ़ राज्य के दबदबा रिहिस। एमे छत्तीसगढ़ के खिलाड़ी ह अपन खेल प्रतिभा के उत्कृष्ट प्रदर्शन करके 2 स्वर्ण पदक, 3 रजत पदक अउ 6 कांस्य पदक सहित कुल 11 पदक हासिल करे। जानबा होवय के हरियाणा के पंचकुला म आयोजित खेलो इंडिया यूथ गेम्स म छत्तीसगढ़ राज्य ले 13 खेल के 122 खिलाड़ी ह हिस्सा लिस।
मुख्यमंत्री श्री बघेल ह खेलो इंडिया यूथ गेम्स म छत्तीसगढ़ के खिलाड़ी मनके उपलब्धि म प्रसन्नता जाहिर करत येकर सराहना करिस। ओमन किहिन के येकर ले हमर छत्तीसगढ़ राज्य राष्ट्रीय स्तर म गौरवान्वित होइस हावय। ओमन किहिन के राज्य सरकार डहर ले ‘‘खेलबो......जीतबो..........गढ़बो...नवा छत्तीसगढ़’’ के परिकल्पना ल साकार करत हर संभव पहल के जात हावय। जेकर ले प्रदेस के मान बढ़ाये वाला हर हुनरमंद खिलाड़ी ल कोनो परेशानी न हो अउ वो अपन प्रतिभा के अच्छा ले अच्छा प्रदर्शन कर सके।
खेलो इंडिया यूथ गेम्स म छत्तीसगढ़ के पहिली स्वर्ण पदक वेटलिफ्टिंग म मिलिस। एमे ज्ञानेश्वरी यादव ह 164 किलोग्राम वजन उठाकर अपन जुन्ना रिकार्ड के ब्रेक करत होए स्वर्ण पदक हासिल करिन हावय। ए स्पर्धा म छत्तीसगढ़ के राजा भारती ह कुल 211 किलोग्राम वजन उठाकर कांस्य पदक जीते हावय। इही रकम ले मलखंभ म 1 अउ स्वर्ण पदक सरिता पोयाम ल मिले होइस। मलखंभ म ही सरिता पोयाम ह एक कांस्य पदक, मोनू नेताम ह 2 रजत पदक अउ बालिका दल ह 1 कांस्य पदक अउ बालक दल ह 1 कांस्य पदक हासिल करिन। येकर अलावा गतका म रणवीर ह (व्यक्तिगत) 1 रजत पदक अउ छत्तीसगढ़ राज्य के गतका दल ह 1 कांस्य पदक अउ कलारीपयतु म साधिका दुबे ह 1 कांस्य पदक जीतके छत्तीसगढ़ के नाम रौशन करिन।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।