अंजोर.सिनेमा। छत्तीसगढ़ी सिनेमा म नायिका मनके अक्सर नवा-नवा चेहरा नजर आथे। कभू माया नगरी मुंबई ले त कभू साउथ अउ बांग्ला सिनेमा ले नायिका छॉलीवुड बलाये जाथे। हाल ही म मनीष मानिकपुरी के निर्देशन म बने गजेन्द्र श्रीवास्तव के फिलिम 'मार डारे मया म' म ओडिशा के सफल अभिनेत्री लिप्सा मिश्रा हावयं। ये छत्तीसगढ़ी म उंकर शायद पहिली मूवी हावय, लिप्सा मिश्रा उड़िया भाषा के केऊ वीडियो एलबम अउ फीचर फिल्म म दमदार अदाकारी के जलवा दिखा चुके हावयं।
वेब सोर्स ले मिले जानकारी के मुताबिक लिप्सा मिश्रा के जनम ओडिशा के पुरी शहर म 15 जुलाई 1992 के होइस रिहिस। ओमन उत्कल संगीत कॉलेज अउ बीजेपी कॉलेज ले उच्च शिक्षा के संग ओडिसी नृत्य तको सीखा हावय। उड़िया सिनेमा के छोटा पर्दे म उंकर आगमन टीवी शो के माध्यम ले होइस। बड़े पर्दा म 2015 म उंकर पहिली फिल्म रीलिज होइस माया जेमा उंकर संग अनु चौधरी अउ सुनील कुमार तको रिहिस।
उड़िया टेली सीरीज 'किच्ची लुहा पाई जाए ओथा' म खुशी के किरदार अउ 'तोह अगनारा तुलसी मु' के तुलसी किरदार ले ओमन खूब लोकप्रियता हासिल करिस। बहुमुखी प्रतिभा के धनी लिप्सा मिश्रा बहुत ही कम समय म उड़िया सिनेमा म बहुत बड़का मुकाम पाये वाला कलाकार मन म ले एक हावयं। लिप्सा मिश्रा न केवल अभिनय करत हावयं बल्कि नृत्य, गायन के संग ही लेखन अउ निर्देशन म तको दखल रखत हावयं। कला अउ कलाकार मन बर क्षेत्रीयता कोनो बाधा नइ होवय, छत्तीसगढ़ ले तको कई कलाकार मुंबई के संग भोजपुरी अउ उड़िया म भाग्य आजमात हावयं।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।