रायगढ़ मेडिकल कॉलेज हॉस्पिटल म अस्थिरोग सुरू, सर्जरी अउ फिजियोथेरेपी के ओपीडी, 30 मई ले मनोरोग, चर्मरोग, दंत चिकित्सा, नाक कान गला रोग अउ जनरल मेडिसिन के ओपीडी तको सुरू

अंजोर.रायगढ़, 28 मई। स्वास्थ्य मंत्री टी.एस.सिंहदेव ह पाछु दिन अपन रायगढ़ प्रवास के बखत मेडिकल कॉलेज हॉस्पिटल के नवा भवन म विभाग के शिफ्टिंग के निर्देश मेडिकल कॉलेज प्रबंधन ल दे रिहिस। जेकर बाद मेडिकल कॉलेज हॉस्पिटल के नवा भवन म विभाग के शिफ्टिंग सुरू हो गे हावय अउ उंकर ओपीडी तको नवा बिल्डिंग म सुरू कर दीस। मेडिकल कॉलेज के अधीक्षक डॉ.मनोज मिंज ह बताइन के हॉस्पिटल के नवा भवन म अस्थि रोग, सर्जरी अउ फिजियोथेरेपी विभाग के सनिच्चर ले ओपीडी सुरू करके मरीज मनके इलाज सुरू करके दे हावय। ये विभाग हॉस्पिटल बिल्डिंग मिडिल ग्राउंड फ्लोर म सुरू करे गे हावयं। ओमन बताइन के 30 मई सोमवार ले 5 आन विभाग के ओपीडी तको इहां सुरू करे जाही। जेमा मनोरोग, चर्मरोग, दंत चिकित्सा, नाक, कान, गला रोग अउ जनरल मेडिसिन सामिल हावयं। येकर संग इहां एमआरडी (मेडिकल रिकॉर्ड डिपार्टमेंट) तको सुरू कर दे हावय। ओमन किहिन के आन आन विभाग के तको जल्दीह शिफ्टिंग के तइयारी के हावय।