पंचायत प्रतिनिधी मनके बाढि़स मानदेय, मुख्यमंत्री के जताए आभार

अंजोर.रायपुर, 02 मई। मुख्यमंत्री भूपेश बघेल ले उंकर निवास कार्यालय म पंडरिया विधायक श्रीमती ममता चंद्राकर के अगुवई म कबीरधाम जिला के सहसपुर लोहारा विकासखण्ड के पंचायत प्रतिनिधि मण्डल ह मुलाकात करिस। ओमन पंचायत प्रतिनिधि मन के मानदेय बढ़ाये के खातिर मुख्यमंत्री के प्रति आभार व्यक्त करिन।

सरपंच संघ के ब्लॉक अध्यक्ष शेषनारायण सिंह बैस ह अवगत कराइन के पंचायत प्रतिनिधि मन डहर ले विकास बुता के प्राथमिकता के संग समय म पूरा कराये के खातिर सतत प्रयास करे जात हावय। ओमन बड़े विनम्रता ले मुख्यमंत्री के पंडरिया विधानसभा क्षेत्र के भ्रमण के खातिर नेवता तको दीस। 

जानबा होवय के जिला पंचायत अध्यक्ष के मानदेय 15 हजार ले बढ़ाके 25 हजार, जिला पंचायत उपाध्यक्ष के मानदेय 10 हजार ले बढ़ाके 15 हजार अउ जिला पंचायत सदस्य मन के मानदेय 6 हजार ले बढ़ाके 10 हजार प्रतिमाह करे गे हावय। जनपद पंचायत अध्यक्ष के मानदेय 6 हजार ले बढ़ाके 10 हजार, जनपद पंचायत उपाध्यक्ष के मानदेय 4 हजार ले बढ़ाके 6 हजार अउ जनपद पंचायत सदस्य मन के मानदेय 1 हजार 500 ले बढ़ाके 5 हजार प्रतिमाह करे गे हावय। सरपंच के भत्ता 2 हजार ले बढ़ाके 4 हजार अउ पंच के भत्ता 200 ले बढ़ाके 500 रूपिया प्रतिमाह करे गे हावय।