कलाकार मन जमके खेलत हाबे होली... देखव फागुन के रंग

अंजोर.सिनेमा। फागुन के रंग एसो जम के उड़त हाबे। चारो मुड़ा सरा... ररा... फाग के गुंज के संग पिचकारी अउ रंग-गुलाल के थारी ले दाहपट मातगे हावय गली खोर। काबर के कोरोना के सेती पाछू दू साल ले कोनो आयोजन नी होए रिहिस तेने पाके, अऊ उमंग बाड़गे हावय। आम आदमी तो होली म मस्ता रिबे करथे, अउ अब सिने कलाकार मनके होली के उड़दंक सुरू होथे तव सबके नजर उही कोती दउड़ जथे। 

एसो फागुन के रंग म रगे सिनेमा के कलाकार मन होली के रंग म गजब सराबोर दिखिस। अउ एकेच पंडप म एसोसियेसन कोति ले जुरियाके तिहार मनाइस। येकर अलावा आने-आने चैनल अउ संस्थान के होरी के धूम अलग। कलाकार मनके होली के आरो अब सशोल मीडिया म तको आना सुरू होगे हावय। छॉलीवुड के सफल अभिनेत्री अनिकृति चौहान ह एसो के होली म अलगे अंदाज म फोटो के संग लोगन ल बधाई दे हावय। 

अभिनेत्री अनिकृति चौहान के होली फोटो ओकर साथी ले हावय जेन म अनिकृति चाकलेटी साड़ी अउ लाली ब्लाउस म सुंदर अकन ले फोटोग्राफी कराये हाबे। खूबसूरत अदा ले सबला मोहित करने वाला अदाकारा के ये रूप घातेच फबत हाबे। अइसने आन सबो कलाकार- मन कुरैशी, दिलेश साहू, अनुज शर्मा, करन खान, मुस्कान साहू, सोनाली सहारे, काजल सोनबेर, उपासना वैष्णव, रजनीश झांझी,  क्रांति दीक्षित, अजय पटेल, प्रदीप शर्मा, मनीषा वर्मा आदि कलाकार सहित निर्देशक सतीश जैन, मनोज वर्मा, प्रणव झा, अभिषेक सिंह, मोहत साहू, पवन तातेड़, धर्मेंद्र चौबे, पुष्पेंरद्र सिंह उक मन तको होरी के रंग म रंगाये जमके फगुवा खेलत हाबे। आप सब ल हमरो कोति ले होली तिहार के नंगत के बधाई...