फिल्म ‘बाजीगर’ म फेर दिखही मन कुरैशी अउ अनिकृति के सुपरहिट जोड़ी

अंजोर.ए। छत्तीसगढ़ी फिल्म इंडस्ट्री अपन पूरा रूवाब म हाबे, धड़ाधड़ शूटिंग, मुहूर्त अउ प्रदर्शन के दौर चलत हाबे। इही बीच फिल्ममेकर उदय कृष्ण के एक अऊ छत्तीसगढ़ी फिल्म के श्रीगणेश होइस जे‍कर नाम हाबे ‘बाजीगर’। साई कृष्ण प्रोडक्शन हाउस के बैनर तले बनइया ये फिल्म के लेखक, निर्माता अउ निर्देशक हाबे उदय कृष्ण। अहम किरदार म नजर आही मन कुरैशी, अनिकृति चौहान, क्रांति दीक्षित अउ अजय पटेल। 

उदय कृष्ण कोति ले सोशल मीडिया म मिले आरो के मुताबिक फिल्म के मुहूर्त पाछु दिन एक निजी होटल म करे गिस। ये मउका म निर्माता मोहन सुंदरानी, मोहित कुमार साहू संग मन कुरैशी, क्रांति दीक्षित, अजय पटेल, अनुपमा मनहर, मंदिरा सहित कई कलाकार जुरियाए रिहिन।

निर्माता निर्देशक उदय कृष्ण के अभी एक अऊ फिल्म कुरूक्षेत्र कतार म हावय। ये फिल्म म करन खान हीरो हावय जेकर गाना संग शिवरीनारायण म आखरी शूटिंग करे गिस। अभी कुरूक्षेत्र के काम पूरा होए म समय हाबे येकर ले आकब करे जा सकत हाबे के बाजीकर के शूटिंग म अभी उदय लउहा नइ लेही। 

• फिल्म – बाजीगर
• निर्देशक – उदय कृष्ण
• निर्माता – उदय कृष्ण
• कलाकार – मन कुरैशी, अनिकृति चौहान, क्राति दीक्षित, अजय पटेल