बेरोजगारी ले तंग दयाराम अब सब्जी के खेती करके लाखों कमाईस

अंजोर.गौरेला पेंड्रा मरवाही, 03 फरवरी। बेरोजगारी ले तंग दयाराम अब सब्जी के खेती करके लाखों रूपिया के कमाई करत हावयं। पेण्ड्रा विकासखण्ड के गांव विशेषरा निवासी दयाराम पहिली बेरोजगार रिहिस अउ काम के तलाश म भटक रिहिस। दायाराम ह अपन जुबानी बताइन के बेरोजगारी के बीच संयोग ले उंकर संपर्क उद्यान विभाग के अधिकारी ले होइस अउ ओला राष्ट्रीय बागवानी मिशन के तहत सब्जी के खेती करे के जानकारी मिलीस। 

दयाराम योजना के लाभ ले के पात्रता रखत रिहिस सेती उद्यान विभाग डहर ले ओला मल्चिंग, पीवीसी, टपक सिंचाई  उक के सुविधा दे गिस। दयाराम पहिली लगभग 1.5 एकड़ बंजर भूमि म सब्जी लगाये के काम सुरू करिन अउ येकर ले होवइया लाभ के सब्जी उत्पादन म ही लगाके आगू बढ़े। अभी के बेरा म दयाराम 4.5 एकड़ भूमि म ड्रिप एरिगेशन के सुविधा लगे हावय। उंकर डहर ले एक एकड़ म टमाटर के खेती करे जात हावय, जेकर ट्रांसप्लांट तको हो चुके हावय। येकर संग ही भांटा, मिर्च, लौकी, मटर उक के तको खेती ले जात हावय। वो सब्जी उत्पादन ले लगभग 10 लाख रूपिया के कमाई कर चुके हावय।