बदलगे जिनगी : सुखदेव ह पताल मिरचा बेचके कमाइस 3 लाख के मुनाफा

अंजोर.रायपुर, 20 जनवरी। किथे के जिनगी बदले बर एक प्रेरणा ही काफी हावय। कुछ अइसने होइस बेमेतरा जिला के मजगांव के किसान सुखदेव सिन्हा संग। जेन किसानी के भरोसे सुखदेव कभू बमुश्किल परिवार के खातिर भरण-पोषण के इंतजाम कर पात रिहिस, आज सिर्फ टमाटर अउ मिर्च बेचके सलाना तीन लाख रूपिया ले जादा के मुनाफा कमात हावयं। मंझोला किसान सुखदेव सिन्हा के जीवन के तस्वीर बदले के काम उद्यानिकी विभाग ह करिस।

दरअसल उद्यानिकी विभाग जिला के किसान मन ल फल अउ साग-सब्जी के खेती करे ल प्रोत्साहित करत रिहिन हावय। येकर ले परम्परागत धान के खेती के संग फल सब्जी के उत्पादन करके किसान मन के आय तको बढ़त हावय। उद्यानिकी विभाग के योजना के लाभ मजगांव के किसान सुखदेव सिन्हा ल तको मिलिय। परम्परागत खेती ले हटके सुखदेव सिन्हा अब टमाटर-मिर्च के खेती करके आर्थिक समृद्धि तनि आगू बढ़ हावयं। साग-सब्जी के खेती करके बड़का लाभ कमात किसान सुखदेव सिन्हा ल देखके गांव के दूसर किसान तको प्रेरित होत हावयं अउ परम्परागत खेती ले परे उद्यानिकी फसल तनि रूख करत हावयं।