आंगनबाड़ी सुपरवाइजर परीक्षा के व्यापम म हावय प्रवेश पत्र, देखव कइसे होही डाउनलोड अउ का-का हावय नियम

अंजोर.रायपुर,17 जनवरी। महिला अउ बाल विकास विभाग म आंगनबाड़ी के सुपरवाइजर पद खातिर व्यापम कोति ले 23 जनवरी के लिखित परीक्षा आयोजित करे गे हावय। ये परीक्षा दू पाली म होही, जेन म पहिली पाली म आन आवेदक मनके परीक्षा होही अउ दूसर पाली म आंगनबाड़ी म कार्यकर्ता के रूप पाछु 10 साल ले बुता करइया मनके होही। व्यापम कोति ले परीक्षा बर प्रवेश पत्र वेबसाइट ले डाउनलोड करे बर परही। परीक्षार्थी मन अपन आवदेन क्रमांक अउ जनमतिथि भर के निकाल सकत हावय। 

कइसे होही प्रवेश पत्र डाउनलोड- आवेदक ल सबले पहिली व्यापम के https://vyapam.cgstate.gov.in वेबसाइट म जाना होही। इहां नोटिस बोर्ड के खल्हे म लिखे इडमिट कार्ड ल चपके बर परही। ओकर बाद पर्यवेक्षक पद सीधी भर्ती / परिसीमित सीधी भर्ती परीक्षा (MBS21)- 2021 प्रवेश पत्र http://slcm.cgstate.gov.in/VyapamAdmit/ ल चपके बर परही। तेकर पाछू admit card के लिंक आही ओमा पहिली खाना म अपन आवेदन ल देखके धियान से रजिस्टेशन नंबर अउ जनम तरीख भरे ले आवेदक के प्रवेश पत्र डाउनलोड हो जाही।

धियान से पढ़व व्यापम के निर्देश-

1.  सबो परीक्षार्थी मनला मास्क या फेस कवर लगाके आना होही, जेन नइ लगाये रही ओला प्रवेश नइ मिलय। 

2. परीक्षार्थी मनला प्रवेश पत्र के साथ एक पहचान पत्र तको लाना होही, जेमा मतदाता परिचय पत्र, पेन कार्ड, ड्राइविंग लाइसेंस, आधार कार्ड उक जेमा फोटो होही, परीक्षा के दिन मूलकापी रखना होही। 

3. परीक्षा के दिन एक घंटा पहिली परीक्षा केन्द्र पहुंच के सत्यापन कराये बर परही, मास्क या फेस कवर ल हटाके तको जांच करे जाही। 

4. परीक्षा म केवल करिया या नीला रंग के डाट पेन के उपयोग करना होही। 

5. परीक्षा म प्रवेश पत्र अउ पहचान पत्र के अलावा मोबाईल, पर्स, घड़ी उक ले जाये के मनाही हावय। 

6. परीक्षा अपन संग हेंड सेनेटाइजर रख सकत हाबे। 

7. परीक्षक ल भारत सरकार के कोरोना गाइडलाइन के पालन करही होही, नइ करे म परीक्षा ले वंचित तको करे जा सकत हाबे।

8. परीक्षा के बाद काउंसलिंग तक प्रवेश पत्र ल संभाल के रखना होही, व्याकपम ह दूबारा प्रवेश पत्र जारी नइ करय।