नइ सुधरत हावय कोरबा के सरकारी स्कूल के दशा, प्रभारी सचिव के निरीक्षण के बाद अब होही जर्जर भवन के जांच

अंजोर.कोरबा 05 दिसंबर। प्रभारी सचिव अंबलगन पी. ह कोरबा जिला प्रवास के बखत विकासखंड करतला के गांव पंचायत कनकी म स्थित शासकीय उच्चतर माध्यमिक स्कूल के औचक निरीक्षण करिन। कलेक्टर श्रीमती रानू साहू के संग प्रभारी सचिव ह स्कूल म पहुंच के स्कूल के प्राचार्य एस.आर.खरे ले स्कूल म पदस्थ शिक्षक मन अउ पढ़त पढ़ईया मन के बारे म जानकारी लिस। श्री अंबलगन ह स्कूल के सबो कमरा के अवलोकन करिन। मउका म मौजूद स्कूल के शिक्षक अउ पालक समिति के सदस्य मन ह प्रभारी सचिव के स्कूल के जर्जर होए के जानकारी दीस। 

प्राचार्य श्री खरे ह बताइन के शाला भवन 1984 म बनाये गे रिहिस अउ अब ये जीर्ण-क्षीर्ण हो गे हावय। शिक्षक मन ह विद्यार्थी मनके सुरक्षा अउ पढ़ाई सुचारू रूप ले कराये के खातिर ए जर्जर भवन ल तोड़के नया भवन बनाये के मांग करिस। श्री अंबलगन पी. ह तुरते मउका म ही कलेक्टर श्रीमती रानू साहू ल भवन के मजबूती जांच कराये के निर्देश दिस। कलेक्टर ह भी तुरते मउका म मौजूद ग्रामीण यांत्रिकी सेवा अउ लोक निर्माण विभाग के इंजीनियर के दल बनाके भवन के जांच करके तीन दिन म रिपोर्ट दे के निर्देश अधिकारी मन ल दिस। जिला के प्रभारी सचिव ह ए तकनीकी रिपोर्ट के आधार म फइसला लेवत होए जरूरत अनुसार भवन के मरम्मत या डिसमेंटल करके नया भवन बनाये के खातिर योजना तइयार करे के निर्देश कलेक्टर के दिस। कलेक्टर श्रीमती रानू साहू ह भी तुरते ए म सहमति जताते होए लघियात कार्यवाई करे के आश्वासन प्रभारी सचिव के दे।