अंजोर.रायपुर, 23 अक्टूबर। पढ़ईया मन म विज्ञान के प्रति रूचि अउ रूझान बढ़ाने, ओमा वैज्ञानिक दृष्टिकोण अउ तर्क क्षमता के विकास करे बर बाल वैज्ञानिक ल मउका दे खातिर इंस्पायर अवार्ड मानक योजना संचालित हावय। छत्तीसगढ़ राज्य के 14 हजार 520 विद्यालय के पूर्व माध्यमिक अउ हाई स्कूल स्तर के कक्षा 6वीं ले 10वीं तक के होनहार बालक-बालिका ले सत्र 2021-22 म इंस्पायर अवार्ड मानक योजना के तहत ऑनलाईन पंजीयन कराये हावय।
आयुक्त लोक शिक्षण डॉ. कमलप्रीत सिंह ह शिक्षा सत्र 2021-22 म राज्य के सबो पूर्व माध्यमिक विद्यालय अउ हाई स्कूल के कक्षा 6वीं ले 10वीं तक के पढ़ईया मन के जादा ले जादा संख्या म इंस्पायर अवार्ड मानक योजना म सामिल करे के खातिर 70 हजार प्रतिभागी के नामांकन के लक्ष्य दे हावय। लक्ष्य के विरूद्ध अब तक 53 हजार 398 प्रतिभागी के पंजीयन हो चुके हावय।
डॉ. कमलप्रीत सिंह ह बताइन के इंस्पायर अवार्ड मानक योजना के तहत भारत सरकार विज्ञान अउ प्रौद्योगिकी विभाग नवा दिल्ली अउ नवप्रवर्तन प्रतिष्ठान भारत विज्ञान अउ प्रौद्योगिकी विभाग, भारत सरकार के स्वायत्तशासी संस्थान (एनआईएफ) के डहर ले संचालित हावय। एमे राज्य के सबो विद्यालय ले कक्षा छठवीं ले दसवीं तक के पढ़ईया सामिल हो सकत हावयं।
प्रत्येक माध्यमिक स्तर के विद्यालय ले तीन, हाईस्कूल स्तर के विद्यालय ले दू नवा आइडिया अउ अइसे विद्यालय जिहां पहिली माध्यमिक शाला अउ हाईस्कूल एक संग संचालित हों, उहां पांच नवा आइडिया के चयन करे के बाद पंजीयन कराये जा सकत हावय। पढ़ईया मन के आइडिया के पंजीयन के खातिर संबंधित विद्यालय के प्रधान पाठक या प्राचार्य डहर ले या संस्था के विज्ञान शिक्षक के सहयोग ले पंजीयन के प्रक्रिया पूरा कराये जात हावय। पंजीयन आइडिया या प्रोजेक्ट के एनआईएफ डहर ले चयन होए के बाद चयनित प्रतिभागी के मॉडल बनाये के खातिर 10 हजार रूपिया के रकम उंकर बैंक खाते म प्रदाय करे जात हावय।
चयनित पढ़ईया मन डहर ले आइडिया के मुताबिक मॉडल तइयार करके जिला, संभाग स्तर म आयोजित प्रदर्शनी प्रतियोगिता म भाग लेना होथे। इहां प्रतियोगिता म चयनित होए वाला प्रतिभागी राज्य स्तरीय प्रदर्शनी म हिस्सा लेवत हावयं। एमे चयन के बाद एनआईएफ डहर ले प्रायोजित मेंटोरशिफ्ट कार्यक्रम जेन राज्य या राज्य के बाहिर के एनआईटी या आईआईटी म कराये जात हावय, उहां अपन मॉडल के संबंध म जानकारी अउ ओला अच्छा बनाये के खातिर प्रशिक्षित करे जात हावय। मेंटरशिप कार्यक्रम के दू या तीन दिवसीय आवासीय शिविर पढ़ईया मन के खातिर प्रेरणादायक अउ बहुत ही ज्ञानवर्धक होवत हावयं। कार्यक्रम म पढ़ईया मन के संग शिक्षक भी सामिल होवत हावय। ए कार्यक्रम के तहत प्रतिभागियों के अपन प्रोजेक्ट मॉडल के अउ अच्छा बनाये या सुधारे के खातिर जरूरत मुताबिक अधिकतम 50 हजार रूपिया के रकम प्रदाय करे जात हावय।
प्रतिभागी डहर ले मेंटोरशिफ्ट कार्यक्रम के बाद मॉडल प्रोजेक्ट म जरूरी सुधार करके ओला नवा दिल्ली म आयोजित राष्ट्रीय स्तर के प्रदर्शनी म सामिल करे जात हावय। राष्ट्रीय स्तर प्रदर्शनी म चयनित श्रेष्ठ 60 मॉडल प्रोजेक्ट के प्रदर्शन राष्ट्रपति भवन म फेस्टिवल ऑफ इनोवेशन (नवप्रवर्तन) उत्सव म करे जात हावय। इहां प्रतिभागी के राष्ट्रपति के संग मिले अउ गोठबात करे के सुअवसर मिलही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।