राष्ट्रीय आदिवासी नृत्य महोत्सव अउ राज्योत्सव म सामिल होए खातिर गोवा के मुख्यमंत्री ल नेवता

अंजोर.रायपुर, 10 अक्टूबर। छत्तीसगढ़ सरकार डहर ले आयोजित होवइया राष्ट्रीय आदिवासी नृत्य महोत्सव म सामिल होए खातिर गोवा के मुख्यमंत्री डॉ. प्रमोद सावंत ल छत्तीसगढ़ सरकार तनि ले संसदीय सचिव यू.डी.मिंज ह नेवता दिस। ओमन ए मउका म मुख्यमंत्री डॉ. सावंत ल छत्तीसगढ़ राज्य स्थापना दिवस के मउका म एक नवम्बर के आयोजित राज्योत्सव म भी सामिल होए के न्यौता दीस। मुख्यमंत्री डॉ. सावंत ह राष्ट्रीय आदिवासी नृत्य महोत्सव अउ छत्तीसगढ़ राज्योत्सव म आमंत्रित करे जाये के खातिर छत्तीसगढ़ सरकार विशेषकर मुख्यमंत्री दाऊ भूपेश बघेल के आभार जताइस।

संसदीय सचिव श्री मिंज ह गोवा के मुख्यमंत्री डॉ. सावंत ले मुलाकात के बखत छत्तीसगढ़ सरकार डहर ले आयोजित करे जाये वाला राष्ट्रीय आदिवासी नृत्य महोत्सव अउ उंकर उद्देश्य के संबंध म विस्तार ले अवगत कराइस। ओमन किहिन के छत्तीसगढ़ सरकार डहर ले राज्य के समृद्ध आदिवासी संस्कृति ल देश-दुनिया म पहंचाये के उद्देश्य ले सरलग बुता करे जात हावयं। जानबा होवय के राष्ट्रीय आदिवासी नृत्य महोत्सव के आयोजन राजधानी रायपुर म 28 ले 30 अक्टूबर तक होही। ओमन मुख्यमंत्री डॉ. सावंत ले गोवा के सांस्कृतिक दल ल भी राष्ट्रीय आदिवासी नृत्य महोत्सव म भेजे के गेलौली करिन।