राज्य म चाय अउ काफी के खेती ल बढ़ावा दे खातिर छत्तीसगढ़ टी काफी बोर्ड के होही गठन : मुख्यमंत्री दाऊ भूपेश बघेल

अंजोर.रायपुर,17 अक्टूबर। मुख्यमंत्री दाऊ भूपेश बघेल ह छत्तीसगढ़ म चाय अउ काफी के खेती ल बढ़ावा दे खातिर कृषि मंत्री के अध्यक्षता म छत्तीसगढ़ टी काफी बोर्ड के गठन करे जाये के फइसला लिस हावय। उद्योग मंत्री छत्तीसगढ़ टी काफी बोर्ड के उपाध्यक्ष होही। बोर्ड म अतिरिक्त मुख्य सचिव, मुख्यमंत्री सचिवालय, कृषि उत्पादन आयुक्त, प्रबंध संचालक सीएसआईडीसी, कृषि/उद्यानिकी अउ वन विभाग के एक-एक अधिकारी सहित दू विशेष सदस्य भी सामिल करे जाही।

चाय अउ काफी के खेती

मुख्यमंत्री श्री बघेल ह किहिन के स्थानीय कृषक अउ प्रसंस्करणकर्ता लोगन के अधिकतम लाभ सुनिश्चित करे अउ राज्य म चाय-कॉफी के खेती ल बढ़ावा दे के खातिर छत्तीसगढ़ टी काफी बोर्ड के गठन करे जात हावय। ओमन किहिन के अवइया 3 साल म कम से कम दस-दस हजार एकड़ म चाय अउ काफी के खेती करे के लक्ष्य अर्जित करे जाही। चाय अउ काफी के खेती करइया किसान मन ल राजीव गांधी किसान न्याय योजना अउ कृषि विभाग के आन सुविधा दे जाही।

बस्तर जिला म कॉफी के खेती अउ उंकर प्रसंस्करण

जानबा होवय के राज्य के उत्तरी भाग, विशेषकर जशपुर जिला म चाय अउ दक्षिणी भाग, विशेषकर बस्तर जिला म कॉफी के खेती अउ उंकर प्रसंस्करण के व्यापक संभावना हावय। एमे उद्यानिकी अउ उद्योग विभाग के जरूरी भूमिका होही। ए उद्देश्य के पूर्ति के खातिर राष्ट्रीय स्तर के प्रतिष्ठित संस्थान ले तकनीकी मार्ग दर्शन ले के संग ही निजी क्षेत्र के विशेषज्ञ, निवेशक अउ कन्सल्टेंट्स के मदद भी ले जाही।