गोधन न्याय योजना के ले बिलासपुर नगर निगम क्षेत्र के चार गउठान म पशुपालक ले 31 जुलाई 2021 तक 13 हजार 620 क्विंटल गोबर के खरीदी करे गिस। जेकर पूरा उपयोग वर्मी अउ सुपर कम्पोस्ट खातु उत्पादन के संग-साथ गौकाष्ठ अउ आन सामग्री बनाये म करे गिस।
ए योजना के संचालन शहर के मोपका, तिफरा, सकरी अउ सिरगिट्टी क्षेत्र म नरवा, गरवा, घुरवा योजना के तहत बनाये गे गउठान म करे जात हावय। ये गउठान म खरीदे गे गोबर म 4412 क्विंटल के उपयोग वर्मी कम्पोस्ट, 5414 क्विंटल के उपयोग सुपर कम्पोस्ट उत्पादन अउ 3794 क्विंटल गोबर के उपयोग गौकाष्ठ बनाये म करे गे हावय। गउठान म उत्पादित 732 क्विंटल वर्मी कम्पोस्ट खातु म ले 7 लाख ले जादा कीमत के 703 क्विंटल खातु के बेचे जा चुके हावय। इही रकम ले 1,107 क्विंटल सुपर कम्पोस्ट खातु के उत्पादन करे गे। जेमा ले 5 लाख 14 हजार रूपिया कीमत के 856 क्विंटल खातु के बिक्री हो चुके हावय।
गउठान म गोबर ले गौकाष्ठ उत्पादन करके 6 लाख 62 हजार रूपिया कीमत के गौकाष्ठ बेचे जा चुके हावय। येकर उपयोग शमशान घाट म लाश ल जलाने के खातिर लकड़ी के जगह म करे जात हावय। नगर निगम के उपायुक्त राकेश जायसवाल ह बताइन के कोविड काल म संक्रमित शव ल जलाने के खातिर नगर निगम डहर ले गौकाष्ठ के ही उपयोग करे गिस। घर म भी लोगन खाना पकाने के खातिर येकर उपयोग करत हावय। ये पर्यावरण के खातिर सुरक्षित हावय संग ही ये लकड़ी ले सस्ता अउ बने विकल्प हावय। ओमन बताइन के ठंड के दिन म गोबर ले गौकाष्ठ बनाये जात हावय। येकर खातिर चारो गउठान म मशीन भी नगर निगम डहर ले उपलब्ध कराये गे हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।