खातु, बीजहा अउ दवई के गुणवत्ता जांच बर चलत हावय सरलग अभियान, अमानक पाये म बेचे म रोक अउ संस्था ल नोटिस

अंजोर.रायपुर, 28 अगस्त। कृषि विभाग डहर ले राज्य म रासायनिक उर्वरक, बीजहा अउ कीटनाशक दवई के गुणवत्ता म विशेष निगरानी रखे जात हावय। कृषि विभाग के जिला स्तरीय अधिकारी अपन-अपन इलाका म सरलग दबिश देके बीज, खातु अउ कीटनाशक औषधि मनके सेम्पल लेत हावयं, जेकर जांच गुणवत्ता रोकथाम प्रयोगशाला म करे जात हावय। खरीफ सीजन 2021 म 28 अगस्त 2021 के स्थिति म राज्य म बीजहा के 39 नमूना अउ रासायनिक उर्वरक के 87 नमूना अमानक पाए गे हावयं, जेकर लाट ल बेचे म तुरते प्रभाव ले प्रतिबंध लगाये के संग ही संबंधित फर्म ल कृषि विभाग ह नोटिस जारी कर के जवाब-तलब करे हावय। कीटनाशक दवई के भी 67 विश्लेषित नमूना म ले एक नमूना अमानक पाये गे हावय।

कृषि विभाग ले मिले जानकारी के मुताबिक खरीफ सीजन 2021 म बीजहा के अब तक 2234 नमूना खातिर गे सबो नमूना के जांच करे जा चुके हावय। ये नमूना म 2195 नमूना मानक स्तर के अउ 39 नमूना अमानक पाए गे हावय। इही रकम ले रासायनिक उर्वरक के गुणवत्ता के जांच-पड़ताल के खातिर कृषि विभाग के उर्वरक निरीक्षक डहर ले 2211 नमूना आने-आने संस्थान ले हावयं। जेमा ले 1977 नमूना के जांच करे जा चुके हावय। अमानक बीजहा अउ खातु के लाट ल बेचे के विभाग डहर ले प्रतिबंधित करे जाये के संग संबंधित संस्था मन के कारण बताओं नोटिस जारी करे गे हावय। कृषि विभाग के टीम कीटनाशक औषधि के गुणवत्ता के भी जांच करत हावय। जांच टीम ह अब तक कुल 163 सेम्पल आने-आने फर्म ले ले हावयं, जेमा ले 67 नमूना के जांच करे म 66 सैम्पल मानक स्तर के अउ एक सैम्पल अमानक।