सगुनी म फूड प्वाइजनिंग : डॉक्टार मन 208 मरीज के जांच के बाद 62 मरीज ल कराइस भरती, गांव म चिकित्सा कैंप के संग धरसीवां सामुदायिक स्वास्थ्य केंद्र म मरीज मन अब ठीक हावय

अंजोर.रायपुर, 14 जुलाई 2021। मुख्यमंत्री भूपेश बघेल ह रायपुर जिला के तिल्दा विकासखंड के गांव सगुनी म फूड प्वाइजनिंग के मरीज मन के स्वास्थ्य सुधार अउ इलाज के खातिर सबो जरूरी चिकित्सा मुहैया कराये के निर्देश जिला प्रशासन के दे हावय। इही ओढ़र म रायपुर कलेक्टर सौरभ कुमार ह चार अस्पताल म मरीज मन के इलाज के खातिर व्यवस्था सुनिश्चित करे हावय। वो स्वयं सरलग पूरा चिकित्सा बेवस्था के मुआयना अउ मॉनिटरिंग करत हावयं। कलेक्टर ह गांव सगुनी म बनाए गे चिकित्सा कैंप के संग धरसीवां सामुदायिक स्वास्थ्य केंद्र म पहुंच के उहां भरती मरीज मन ले मुलाकात भी करिस अउ उंकर स्वास्थ्य के जानकारी लिस।

जानबा होवय के फ़ूड प्वाइजनिंग के बाद उल्टी-दस्त अउ बुखार जइसे शिकायत मिले रिहिस। चिकित्सा टीम ह 208 मरीज मन के ओपीडी जांच करके, 62 मरीज मन ल इलाज के खातिर आने-आने अस्पताल म भरती करे गिस। गांव सुगनी म बनाए गे चिकित्सा कैंप म 22 मरीज मन ल इलाज खातिर भरती करे गिस। इही रकम ले सामुदायिक स्वास्थ्य केंद्र धरसीवां म 32 मरीज, सामुदायिक स्वास्थ्य केंद्र तिल्दा म 3 मरीज मन अउ प्राथमिक स्वास्थ्य केंद्र खैरखूट म 8 मरीज मन ल भरती करे गिस। स्वास्थ्य ठीक होए म खैरखूट के चार मरीज मन ल अस्पताल ले छुट्टी दे दीस। 02 मरीज म 1 बुजुर्ग होए के सेती अउ दुसरा मरीज पेट म जादा दर्द के शिकायत के बाद मेकाहारा म रिफर करे गिस। ये अस्पताल के सबो मरीज मन के स्थिति म सुधार हावय अउ सबो खतरा ले बाहिर हावय। 

मुख्य चिकित्सा अधिकारी ह बताइन के स्थिति पूरा रकम ले निगरानी अउ रोकथाम म हावय। अस्पताल म तीनों पाली म मेडिकल ऑफिसर अउ मेडिकल स्टाफ ल मरीज मन के इलाज के खातिर ड्यूटी म लगाये गे हावय।कलेक्टर सौरभ कुमार ह मेडिकल कॉलेज रायपुर के विशेष टीम के भी अस्पताल म पहुंच के मरीज मन के स्वास्थ्य के जानकारी ले के निर्देश दे हावय। इही तारतम्य मेडिकल कॉलेज रायपुर के एम.डी. मेडिसीन डॉ. एस. चंद्रवंशी के नेतृत्व म मेडिकल टीम ह गांव सगुनी के मेडिकल कैंप अउ धरसीवां के सामुदायिक स्वास्थ्य केंद्र पहुंच के मरीज मन के इलाज के निरीक्षण करिन अउ उंकर इलाज भी करिन।

चिकित्सा विभाग के डॉक्टर मन अउ पैरामेडिकल स्टाफ के अतिरिक्त टीम भी लगाये गे हावय। गांव सगुनी के मेडिकल कैंप म 6 डॉक्टर मन के संग मेडिकल स्टाफ के भी तैनात करे गे हावय। उंकर सहयोग के खातिर आसपास के 11 गांव के मितानिन मन के ड्यूटी भी लगाये गे हावय। फूड प्वाइजनिंग के संबंध म फूड अउ पानी के सैंपल भी लिस गे हावय। कलेक्टर ह अनुविभागीय दंडाधिकारी, तहसीलदार, जनपद के मुख्य कार्यपालन अधिकारी अउ मुख्य नगरपालिका अधिकारी ल भी सरलग स्थिति के निगरानी करे ल किहिन हावय। कलेक्टर ह गांव के लोगन ले भी अपील करे हावय के अगर कोनो के भी तबीयत खराब होए के जानकारी मिलत हावय त ओला तुरते अस्पताल म लान के देखाये जाए अउ उंकर स्वास्थ्य के देखभाल करे जाए‌‌।