'ट्रेजिडी किंग' दिलीप कुमार साहब अलविदा

अंजोर.रायपुर, 7 जुलाई 2021। हिन्दी सिनेमा के दिग्गज कलाकार दिलीप कुमार अब ये दुनिया म नइ रिहिस। अग्रेंज शासनकाल म पाकिस्तान के पेशावर म 11 दिसंबर 1922 के जन्में दिलीप साहब के नानपन के नाम यूसुफ़ ख़ान हावय, जेन भारतीय सिनेमा म आये के बाद ले दिलीप कुमार के नाम ले जाने गिस। हिन्दी फ़िल्म के एक प्रसिद्ध अउ लोकप्रिय अभिनेता के रूप म जनमानस म राज करे के बाद ओमन राजनीति म तको आइन। संसद के उच्च सदन राज्यसभा के सदस्य रिहिस। भारतीय फ़िल्म के सर्वोच्च सम्मान दादा साहब फाल्के पुरस्कार अउ पाकिस्तान के सर्वोच्च नागरिक सम्मान निशान-ए-इम्तियाज़ ले सम्मानित दिलीप कुमार साहब 7 जुलाई 2021 के बिहनिया बीतगे।

'ट्रेजिडी किंग' दिलीप कुमार

    भारतीय सिनेमा म दिलीप कुमार के अदाकारी के जलवा रिहिस अपन दौर म, आजों वो जलवा बरकरार हावय। दिलीप साहब के ज्यादातर फिल्म असल जीवन ल रेखांकित करत बनाये जाए, कोनो त्रासदी या दु:खद भूमिका म उंकर जीवंत अदाकारी लोगन ल करेजा हाथ म धरे देखे बर परय। अऊ इही सेती उनला 'ट्रेजिडी किंग' भी कहे जाथे। 

दिलीप साहब के फिल्मी सफरनामा

    दिलीप कुमार यानी मो. युसुफ़ खान पेशावर ले अपन पिता के संग मुंबई आके बसगे रिहिस, जिहां ओमन हिन्दी फ़िल्म म काम करना शुरू करिस। बताथे के ओमन हिन्दी सिनेमा म ज्यादा पहचान अउ सफलता पाये खातिर अपन नाम युसुफ़ खान ले बदल के दिलीप कुमार कर दिस। 

    उंकर पहली फ़िल्म 'ज्वार भाटा' रिहिस जेन 1944 रिलीज होए रिहिस। राज कपूर के साथ फ़िल्म अंदाज़ 1949 म बनिस जेन सफल रिहिस अऊ लोगन मन दिलीप कुमार के अदाकारी ल मानिस। ओकर बाद दिदार 1951 म अउ देवदास 1955 रिलीज होइस जेन दुखद भूमिका म होये के सेती गजब लोकप्रिय होइय। इही बखत मुगले-ए-आज़म 1960 म अइस जेमा ओमन मुग़ल राजकुमार जहांगीर के भूमिका निभाईस।

    अभिनय के अलावा दिलीप साहब म फिल्म तको बनाइस 1961 म गंगा जमुना नाम के जेमा ओकर छोटे भाई नासीर खान काम करे रिहिस। 1970, 1980 अउ 1990 के दशक म ओमन केऊ हिट फिल्म म काम करिस जेमा विधाता (1982), दुनिया (1984), कर्मा (1986), इज्जतदार (1990), सौदागर (1991) अउ किला (1998) आइस जेन ल आज भी देखे जाथे। सिनेमा के‍ दुनिया म दिलीप साहब के जेन ठउर हावय तेन ल कोनो नइ पा सके, भारतीय सिनेमा म 1944 ले लेके 1998 तक केऊ फिल्म उंकर कलाकारी के गवाही हावय। 

परिवार 

    दिलीप कुमार ह अभिनेत्री सायरा बानो ले 1966 म बिहाव करिस। बताथे के ओ बखत दिलीप कुमार 44 साल अउ सायरा बानो 22 वर्ष के रिहिस। सायरा बानो के बाद 1980 आसमां ले ओमन दूसरइया बिहाव तको करिस फेर जादा दिन नइ रिहिस। उंकर परिवार म छोटे भाई नासिर खान अउ भतीजा अयूब खान हावय। 

दिलीप साहब ल मिले फ़िल्मफ़ेयर पुरस्कार के सन अउ फिलिम के नाम

• 1983 - फ़िल्मफ़ेयर सर्वश्रेष्ठ अभिनेता पुरस्कार - शक्ति
• 1968 - फ़िल्मफ़ेयर सर्वश्रेष्ठ अभिनेता पुरस्कार - राम और श्याम
• 1965 - फ़िल्मफ़ेयर सर्वश्रेष्ठ अभिनेता पुरस्कार - लीडर
• 1961 - फ़िल्मफ़ेयर सर्वश्रेष्ठ अभिनेता पुरस्कार - कोहिनूर
• 1958 - फ़िल्मफ़ेयर सर्वश्रेष्ठ अभिनेता पुरस्कार - नया दौर
• 1957 - फ़िल्मफ़ेयर सर्वश्रेष्ठ अभिनेता पुरस्कार - देवदास
• 1956 - फ़िल्मफ़ेयर सर्वश्रेष्ठ अभिनेता पुरस्कार - आज़ाद
• 1954 - फ़िल्मफ़ेयर सर्वश्रेष्ठ अभिनेता पुरस्कार - दाग