चन्दूलाल चन्द्राकर सुरता मेडिकल कॉलेज के पढ़ईया अउ पालकगण मिलिस मुख्यमंत्री ले

अंजोर.रायपुर, 28 जुलाई। चन्दूलाल चन्द्राकर सुरता चिकित्सा कॉलेज दुर्ग म पढ़त छात्र अउ उंकर पालक ह मुलाकात करिस मुख्यमंत्री दाऊ भूपेश बघेल ले। मेडिकल कॉलेज म पढ़त लइका के भविष्य ल सुरक्षित करे के उद्देश्य ले राज्य शासन डहर ले करे जात पहल अउ कॉलेज के अधिग्रहण के फइसला के खातिर मुख्यमंत्री के आभार जताइस। पालक मन किहिन के लइका के भविष्य ल सुरक्षित रखे के खातिर राज्य सरकार ह न सिर्फ ऐतिहासिक फइसला लिस हावय, बल्कि राजधर्म के भी पालन करे हावय। मुख्यमंत्री ह किहिन के लइका हमर भविष्य हावय। इंकर भविष्य के बढि़या बनाये के खातिर शासन हर संभव प्रयास करही।

जानबा होवय के चंदूलाल चंद्राकर सुरता चिकित्सा कॉलेज दुर्ग म 2017 बैच के 180 पढ़ईया चतुर्थ साल म पढ़त हावय। इहां ये लइका के अध्यापन बुता प्रभावित होए के सेती ले मुख्यमंत्री के पहल म राज्य शासन डहर ले लइका के आन मान्यता मिले मेडिकल कॉलेज म फेर आबंटन (रिएलोकेट) करे जाये के आदेश छत्तीसगढ़ शासन के चिकित्सा शिक्षा विभाग डहर ले जारी करे गे हावय। हॉस्पिटल बोर्ड के राज्य अध्यक्ष अउ आईएमए मेडिकल स्टूडेंट नेटवर्क के राज्य संयोजक डॉ. राकेश गुप्ता ह मुख्यमंत्री के बताइन के 2017 के पहिली बैच के लगभग 300 मेडिकल पढ़ईया इंटर्नशिप पूरा करे हावयं, अब वो पीजी नीट के परीक्षा म बैठही। ओमन किहिन के छत्तीसगढ़ सरकार के ए पहल अउ संवेदनशीलता ले 480 छात्र ल भविष्य सुरक्षित होइस।