लोग-लइका मनके स्वास्थ्य अउ पोषण के सशक्त केन्द्र बनिस आंगनबाड़ी : मुख्यमंत्री दाऊ भूपेश बघेल

अंजोर.रायपुर, 07 जुलाई 2021। महिला अउ बाल विकास विभाग के गतिविधी के समीक्षा करत मुख्यमंत्री भूपेश बघेल ह अपन निवास कार्यालय म किहिन के महिला मन अउ लइका के स्वास्थ्य अउ पोषण म विशेष रूप ले धियान दे जाये के जरूरत हावय। छत्तीसगढ़ स्वस्थ अउ सुपोषित हो, येकर खातिर जरूरी हावय के हमर आंगनबाड़ी महिला मन अउ लइका के स्वास्थ्य अउ पोषण के सशक्त केन्द्र के रूप म विकसित हो। ओमन पहिली चरण म राज्य के दस हजार आंगनबाड़ी केन्द्र ल मॉडल केन्द्र के रूप म विकसित करे जाये के योजना के क्रियान्वयन जिला प्रशासन के सहयोग ले सुनिश्चित करे के निर्देश दिस। 

मुख्यमंत्री श्री बघेल ह राज्य म मुख्यमंत्री सुपोषण अभियान के प्रभावी क्रियान्वयन सुनिश्चित करे के संग ही रेडी-टू-ईट के गुणवत्ता अउ वितरण के बेवस्था म कड़ा निगरानी के निर्देश दिस। बइठक म आंगनबाड़ी कार्यकर्ता अउ सहायिका मनके खाली पद के पूर्ति के संबंध म भी गोठबात करे गिस। बइठक म सचिव महिला अउ बाल विकास ह पावर प्वाइंट प्रजेंटेशन के माध्यम ले विभागीय योजना मन अउ कार्यक्रम के जानकारी दीस। 

ओमन बताइन के वजन तिहार के प्रदेशव्यापी आयोजन आंगनबाड़ी केन्द्र म आज 7 जुलाई ले शुरू होइस हावय। 5 साल तक के उमर के 28 लाख लइका के वजन अउ ऊंचाई के माप लेके उंकर सुपोषण स्तर के मूल्यांकन करे जात हावय। ओमन बताइन के राज्य म संचालित सुपोषण अभियान के सार्थक परिणाम आए हावयं। जनवरी 2019 के स्थिति म 4,33,541 लइका कुपोषित रिहिस। मुख्यमंत्री सुपोषण अभियान के तहत पौष्टिक आहार, स्वास्थ्य सुविधाअउ सरलग रूप ले सलाह सेवा उपलब्ध कराये ले एमे 32 फीसद के कमी आये हावय। मई 2021 के स्थिति म 1,40,556 लइका कुपोषण ले बाहिर आ चुके हावयं अउ 81 हजार ले जादा महिला मन एनीमिया ले मुक्त होए हावय। 

ओमन मुख्यमंत्री बाल संदर्भ योजना, मुख्यमंत्री कन्या बिहाव योजना, नोनी सुरक्षा योजना, सुचिता योजना, महतारी जतन योजना, सामाजिक विकास अउ महिला सशक्तिकरण योजना मन के प्रगति के जानकारी दीस। ओमन बताइन के विभाग के अधीन गठित महिला स्व-सहायता समूह सामाजिक सरोकार के बढि़या बनाये के संग ही गउठान अउ आन गतिविधी ले जुड़के सामाजिक अउ आर्थिक रूप ले स्वावलंबन तनि अग्रसर हावय।

बैठक म जानकारी दीस गे के राज्य म कुल 52,474 आंगनबाड़ी केन्द्र संचालित हावय, जेमे ले 3 हजार आंगनबाड़ी केन्द्र के मॉडल अउ नर्सरी स्कूल के रूप म विकसित करे जा चुके हावय। ए साल 10 हजार आंगनबाड़ी केन्द्र के मॉडल केन्द्र के रूप म विकसित करे जाये के योजना हावय। राज्य म रेडी-टू-ईट के निर्माण म 1,620 अउ गरम भोजन प्रदाय बुता म 18,460 महिला स्व-सहायता समूह संलग्न हावय।