आदिवासी मनके जमीन म लगे रूख ल काटे खातिर सरल होही अनुमति के प्रक्रिया : मुख्यमंत्री दाऊ भूपेश बघेल

अंजोर
0

अंजोर.रायपुर, 16 जुलाई 2021। आदिवासी मनके निजी भुइंया म रूख के काटे के खातिर अनुमति करे के प्रक्रिया के सरल करे के प्रस्ताव म सदस्य मन के संग गोठबात के बाद सर्वसम्मति ले आदिम जनजाति के संरक्षण (पेड़ के हित म) अधिनियम 1999 अउ नियम 2000 म संशोधन के अनुशंसा करे गिस। जेकर मुताबिक रूख काटे की अनुमति कलेक्टर के जगह अनुविभागीय अधिकारी राजस्व डहर ले दू महीना के समय-सीमा के भीतर दे जाही। हितग्राही रूख काटे के अनुमति बर अपन आवेदन अनुविभागीय अधिकारी राजस्व ल देही। 

मउका के मुआयना पटवारी अउ रेंजर डहर ले करे जाही। अनुमति मिले के बाद वन विभाग डहर ले रूख के कटाई अउ नीलामी के कार्यवाही करे जाही अउ वनमण्डलाधिकारी डहर ले संबंधित हितग्राही के बैंक खाता म रकम जमा करे जाही। येकर ले अवैध कटाई म अंकुश लगही अउ आदिवासी मनला उंकर रूख के उचित दाम मिलही। बइठक म ये भी साफ करिन के मुख्यमंत्री वृक्षारोपण प्रोत्साहन योजना ले जेन हितग्राही रूख लगाये गे हावय ओला काटे के खातिर हितग्राही मन ल केवल सूचना देना होही। 

छत्तीसगढ़ जनजाति सलाहकार परिषद के बइठक म आज पहिली बार पहाड़ी कोरवा विकास अभिकरण के अध्यक्ष पीताम्बर राम अउ बैगा विकास प्राधिकरण के अध्यक्ष गिरधारी बैगा शामिल होइस अउ मुख्यमंत्री ह उंकर ले गोठबात भी करिस। परिषद के येकर ले पहिली आयोजित बइठक म जनजाति सलाहकार परिषद म विशेष पिछड़ी जनजाति के प्रतिनिधि मन के शामिल करे के अनुशंसा करे गिस रिहिस। 

गिरधारी बैगा ह मुख्यमंत्री ले गोठबात के बखत मरवाही के धनौली म कक्षा 11वीं अउ 12वीं के पढ़ईया मन के खातिर छात्रावास अउ एक कन्या छात्रावास के स्वीकृति अउ विशेष पिछड़ी जनजाति के लोगन ल बकरी पालन, मुर्गी पालन, सुअर पालन, गाय पालन के खातिर शासकीय योजना मन के लाभ दिलाने के गेलौली करिन। मुख्यमंत्री ह उंकर ले किहिन के जनजाति के युवा समूह बनाके गउठान म ये गतिविधी ल सुरू कर सकत हावयं, इंकर खातिर मदद उपलब्ध कराये जाही। कोदो, कुटकी के खातिर हालर मिल के बेवस्था भी गउठान म करे जाही। बइठक म विशेष पिछड़ी जनजाति के शिक्षित युवा मन के सरकारी नौकरी म भरती प्रक्रिया म तेजी लाने के अनुशंसा करे गिस।

एक टिप्पणी भेजें

0टिप्पणियाँ

सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।

एक टिप्पणी भेजें (0)

#buttons=(Accept !) #days=(20)

Our website uses cookies to enhance your experience. Check Now
Accept !