अंजोर.कोण्डागांव, 02 जुलाई 2021। कार्यालय मुख्य चिकित्सा अउ स्वास्थ्य अधिकारी डहर ले जारी विज्ञप्ति मुताबिक कलेक्टर पुष्पेन्द्र कुमार मीणा के मार्गदर्शन अउ मुख्य चिकित्सा अउ स्वास्थ्य अधिकारी डा. टीआर कुंवर के नेतृत्व म स्वास्थ्य विभाग के अधिकारी-कर्मचारी डहर ले जिला म 01 ले 15 जुलाई तक गहन डायरिया रोकथाम पखवाड़ा मनाये जात हावय। जेकर शुरूवात विकासखण्ड कोण्डागांव के उप स्वास्थ्य केन्द्र बनजुगानी म हेंड वाशिंग अउ ओआरएस घोल बनाये के विधि अउ आन मौसमी बीमारी के रोकथाम के उपाय ल मितानिन, एएनएम, स्कूली लइका अउ जन सामान्य ल बताके करिन।
जिला म 0 ले 05 साल के लइका म मृत्यु के एक मुख्य कारण डायरिया हावय। एकर बर जिला म लघियात उपचार ले शिशु मृत्यु दर म कमी लाये जा सकत हावय। लइका म डायरिया ले होवइया मृत्यु के रोकथाम के खातिर ही ये गहन डायरिया रोकथाम पखवाड़ा प्रदेश के संग जिला म सुरू करे गे हावय। ए पखवाड़ा म आने-आने माध्यम ले क्षेत्र म डायरिया रोकथाम के प्रयास म अउ तेजी लाये जाही।
गांव म मितानिन मन डहर ले 0 ले 05 साल तक के लइका के घर म ओआरएस पैकेट वितरण के संग घोल बनाये के विधि भी बताये जात हावय। येकर अलावा जल शुद्धि के खातिर क्लोरिन टेबलेट के भी वितरण करे जात हावय। येकर अलावा आने-आने संचार माध्यम के उपयोग करके जनसमुदाय म जागरूकता लाने बर प्रचार-प्रसार भी करे जात हावय। गांव म आयोजित काउंसलिंग सत्र के बखत स्वास्थ्य कार्यकर्ता डहर ले ओआरएस जिंक के महत्ता, स्तनपान के उपयोगिता के गोठबात के संग हाथ धोये के सही विधि के भी प्रदर्शन करे जात हावय।
सबो स्वास्थ्य संस्था मन म ओआरएस जिंक के पर्याप्त भण्डारण सुनिश्चित करे गे हावय अउ ये केन्द्र के ओपीडी अउ आईपीडी वार्ड म ओआरएस, जिंक कार्नर स्थापित करे गे हावयं। जेकर ले लोगन ल आसानी ले ये उपलब्ध हो पाही। डायरिया रोकथाम ले आन संस्था मन जइसे महिला अउ बाल विकास, पंचायत विभाग, शिक्षा विभाग, आदिम जाति कल्याण विभाग ले समन्वय स्थापित करके सहयोग ले जात हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।