राष्ट्रीय शिक्षा नीति: नान्हे लइका मन स्कूली शिक्षा ले पहिली बाल-वाटिका म करही पढ़ई, संसाधन अउ बेवस्था के आंकलन करके प्रस्ताव बनाये के निर्देश

अंजोर.रायपुर, 09 जुलाई 2021। स्कूली शिक्षा ले पहिली आंगनबाड़ी के नन्हे लइका बाल-वाटिका म पढ़ई करही। बाल-वाटिका म लइका ल स्कूली शिक्षा के खातिर तइयार करे जाही। राष्ट्रीय शिक्षा नीति के तहत राज्य म बाल वाटिका सुरू करे के संबंध म विस्तृत-विचार विमर्श मंत्रालय म प्रारंभिक बाल्यावस्था देखभाल अउ शिक्षा के एकीकरण बर गठित विशेष संयुक्त बल के बइठक करिन। स्कूल शिक्षा विभाग के प्रमुख सचिव डॉ. आलोक शुक्ला के अध्यक्षता म आयोजित बइठक म राष्ट्रीय शिक्षा नीति म प्रस्तावित नवा स्ट्रक्चर लागू करे के खातिर सबो बेवस्था अउ संसाधन के आंकलन करके प्रस्ताव तइयार करे के निर्देश दे हावयं।

स्कूल शिक्षा विभाग के प्रमुख सचिव डॉ. शुक्ला ह संयुक्त बल के बइठक म बाल-वाटिका अउ कक्षा पहिली म लइका ल सीखये के खातिर पाठ्यक्रम, पाठ्य साम्रगी, शाला तइयारी मोड्यूल अउ प्रशिक्षण मोड्यूल तइयार करे ल किहिन हावय। ओमन किहिन के आंगनबाड़ी स्तर म यू-डाईस डाटा अउ समग्र शिक्षा के उपयोगी डाटा के मर्ज करे के निर्देश दिस। ओमन अधिकारी मन के राष्ट्रीय शिक्षा नीति के लागू करे के खातिर छोटे-छोटे सब टास्क फोर्स गठित करके आपस म मंत्रणा अउ ब्रेन-स्टोर्मिंग सत्र के आयोजन करे के सुझाव दीस।  

डॉ. शुक्ला ह शिक्षक मन के सतत् क्षमता विकास के खातिर आदिवासी विकास विभाग म साल ले कार्यरत कुशल अउ अनुभवी प्राचार्य के सेवा खातिर जाये के सुझाव भी दीस, ओमन येकर खातिर कार्ययोजना तइयार करे ल किहिन। राष्ट्रीय शिक्षा नीति म प्रस्तावित क्लस्टर स्कूल एप्रोच ल प्राथमिकता के तौर म नक्सल प्रभावित क्षेत्र म एजुकेशन हब मॉडल के रूप म तइयार करे जाये म विचार करे जा सकत हावय। इही रकम ले ओमन स्वास्थ्य विभाग के विशिष्ट जरूरत वाला पढ़ईया के खातिर एक कार्यक्रम तइयार करके प्रस्तावित करे के निर्देश भी दिस।