नवा रायपुर म जाही संस्कृति संचालनालय, मंत्री करिस संस्कृति परिषद कार्यालय के प्रस्तावित भवन के निरीक्षण

अंजोर.रायपुर, 9 जुलाई 20121। राजधानी रायपुर के संस्कृति संचालनालय जल्दी ही नवा रायपुर म शिफ्ट हो जाही। संस्कृति मंत्री अमरजीत भगत ह आज नवा रायपुर सेक्टर 27 म बने छत्तीसगढ़ गृह निर्माण मंडल के भवन जेन संस्कृति परिषद कार्यालय के खातिर प्रस्तावित हावय के निरीक्षण करिन। जानबा होवय के राज्य सरकार डहर ले छत्तीसगढ़ के संस्कृति के संरक्षण अउ संवर्धन के संग ए विधा के प्रति लोगन ल प्रोत्साहित करे के खातिर छत्तीसगढ़ संस्कृति परिषद के गठन करे गे हावय। 

संस्कृति परिष्द ले साहित्य अकादमी, कला अकादमी, आदिवासी लोक कला अकादमी, छत्तीसगढ़ फिल्म विकास निगम, छत्तीसगढ़ सिंधी अकादमी अउ छत्तीसगढ़ राजभाषा आयोग संचालित होही। संस्कृति विभाग के अधीन संचालित सबो प्रभाग ल एक छाता तरी बुता करे के अवधारणा के लेके जल्दी ही अमल म लात संस्कृति संचालनालय ल रायपुर ले नवा रायपुर म शिफ्ट करे के तइयारी करे जात हावय।

मंत्री श्री भगत ह भवन निरीक्षण के बखत किहिन के छत्तीसगढ़ी संस्कृति के मुताबिक कार्यालय के सुसज्जित स्वरूप हो। कार्यालय भवन म रिसेप्शन के कर्मचारी अउ गाइड अपडेटेड हों ताकि आन राज्य अउ विदेश ले आने वाला पर्यटक, कलाकार अउ नागरिक ल छत्तीसगढ़ी, हिन्दी अउ अंग्रेजी म विस्तार ले छत्तीसगढ़ी संस्कृति के बारे म जानकारी दे सकें। मंत्री श्री भगत ह कार्यालय भवन म सबो अकादमी, फिल्म विकास निगम मंडल के अध्यक्ष अउ सदस्य मन के खातिर भी बइठक बेवस्था करे के निर्देश अधिकारी मन ल दिस। ओमन किहिन के एक छत तरी सबो प्रभाग ल लाने के अवधारणा पूरा होना चाही, जेकर ले कार्यालय आने वाला नागरिक, कलाकार, बुद्धजन ल येकर लाभ मिल सके। ओमन आगंतुक के चाय-नाश्ता, भोजन उक के खातिर गढ़कलेवा या कैंटिन संचालित करे म भी जोर दे।

मंत्री श्री भगत ह संस्कृति परिषद् के खातिर प्रस्तावित कार्यालय भवन के निरीक्षण के बाद कर्मचारी मन, अधिकारी मन, अध्यक्ष, उपाध्यक्ष अउ सदस्य मन के खातिर टेबल-कुर्सी के बेवस्था सहित बिजली, पंखा अउ साफ-सफाई बेवस्था दुरूस्त करे के भी निर्देश दिसे। ए मउका म संस्कृति अउ पुरातत्व विभाग के सचिव अन्बलगन पी., संस्कृति विभाग के संचालक विवेक आचार्य सहित छत्तीसगढ़ गृह निर्माण मंडल अउ संस्कृति विभाग के वरिष्ठ अधिकारी उपस्थित रिहिस।