फूंडा, पाटन म जापान के मियावाकी तकनीक ले लगही पेड़, 10 गुना होथे बड़वार अउ 30 गुना बगरथे जंगल

अंजोर.दुर्ग, 6 जून 2021। मुख्यमंत्री श्री बघेल ह अपन निवास कार्यालय म आयोजित कार्यक्रम म दुर्ग जिला के गांव फुंडा म 20 एकड़ क्षेत्र म बनाए जात जैव विविधता उद्यान के भूमिपूजन करिन। मिले आरो के मुताबिक फूंडा, पाटन म जैवविविधता पार्क म जापान के मियावाकी तकनीक ले पउधा लगाये जाही। जेमा पउधा 10 गुना तेजी ले बढ़थे 30 गुना बगरथे जंगल ह। इही रकम ले ओमन बिलासपुर म अरपा नदी के तट म के गांव सेंदरी, बस्तर जिला के गांव कोहकीमारी, डिलमिली, करपावण्ड, बलरामपुर जिला के गांव भेलईखुर्द, कांकेर जिला के कुलगांव, महासमुन्द जिला के मुंगईमाता, कवर्धा जिला के लोहझरी म वृक्षारोपण बुता के शुभारंभ करत कार्यक्रम म उपस्थित सांसद-विधायक, संसदीय सचिव, वन प्रबंधन समिति के सदस्य अउ स्व-सहायता समूह के सदस्य अउ पंचायत प्रतिनिधि मन ले गोठबात करिन। ओमन योजना के क्रियान्वयन के खातिर जन सहभागिता बढ़ाये के खातिर जादा ले जादा लोगन ल जोड़े के गेलौली करिन।  

वन मंत्री मोहम्मद अकबर ह कार्यक्रम के अध्यक्षता करत किहिन के राज्य सरकार डहर ले शुरू करे गे मुख्यमंत्री वृक्षारोपण प्रोत्साहन योजना छत्तीसगढ़ के पर्यावरण सुधार के दिशा म क्रांतिकारी योजना साबित होही। येकर ले निजी भूमि म वृक्षारोपण ल बढ़ावा मिलही। गांव म पर्यावरण सुधार, भू-जल स्तर म बड़वार सहित केऊ रकम ले लाभ लोगन ल मिलही। ए मउका म आने-आने जिला ले सांसद, संसदीय सचिव, विधायक, जंगल प्रबंधन समिति के सदस्य भी ऑनलाईन जुड़े रिहिस। मुख्यमंत्री निवास कार्यालय म मुख्यमंत्री के सलाहकार राजेश तिवारी अउ विनोद वर्मा, मुख्यमंत्री के सचिव सिद्धार्थ कोमल सिंह परदेशी भी उपस्थित रिहिस।