सोशल मीडिया म वीडियो वायरल होए के बाद रांका के पटवारी निलंबित

अंजोर.बेमेतरा, 14 जून 2021। किसान मनके सबले जादा काम-बुता पटवारी मनले ही होथे अउ येमन कतका उपई होथे तेनो ल सबेच कोनो जानथे। आये दिन कोनो न कोनो पटवारी ह किसान मनला पइसा खातिर रोववत रिथे, फेर अब सोशल मीडिया ह सबके पै उघार देथे। 

पाछू दिन सोशल मीडिया म आये वीडियो ल त देखेच होहू जेमा पटवारी ह किसान ले ऋण पुस्तिका बनाये खातिर पइसा लेवत हावय। जेमा अब प्रशासन कोति ले बड़का कार्यवाही करत जिला के बेरला तहसील के अन्तर्गत पटवारी हल्का नम्बर 19 गांव रांका के पटवारी शंकर लाल नेताम ल तुरते प्रभाव ले निलंबित करके दे गे हावय। उंकर विरुद्ध एक किसान ले ऋण पुस्तिका बनाये बर नगद रकम के मांग करे के शिकायत मिले म एसडीएम बेरला डहर ले संबंधित पटवारी ल तुरते प्रभाव ले निलंबित करके दे गे हावय। ए शिकायत के गंभीरता ले लेवत अनुविभागीय अधिकारी (रा.) बेरला डहर ले संबंधित पटवारी के शो-काज नोटिश जारी करे गे रिहिस। पटवारी नेताम डहर ले करार तिथि तक अपन पक्ष म कोनो स्पष्टीकरण प्रस्तुत नइ करे गे हावय। निलंबन बखत म नेताम के मुख्यालय तहसील कार्यालय बेरला नियत करे गे हावय। ए बखत ओला जीवन निर्वाह भत्ता के पात्रता होही।

कलेक्टर भोसकर विलास संदीपान ह किहिन हावय के यदि कोनो शासकीय कर्मचारी/अधिकारी यदि किसान मन, गांव वाला अउ आम नागरिक के काम करे म हीलाहवाला करत हावय या रकम के मांग करत हावय त उंकर विरुद्ध कड़ा अनुशासनात्मक कार्यवाही करे के चेतावनी दे हावय।