यूएनडीपी अउ नीति आयोग ह मलेरिया मुक्त बस्तर अभियान ल सहराइस

अंजोर.रायपुर, 13 जून 2021। संयुक्त राष्ट्र विकास कार्यक्रम (यूएनडीपी) अउ नीति आयोग ह प्रदेश के बस्तर संभाग म मलेरिया उन्मूलन के खातिर राष्ट्रीय स्वास्थ्य मिशन, छत्तीसगढ़ डहर ले संचालित मलेरिया मुक्त बस्तर अभियान के सराहना करे हावय। यूएनडीपी ह नीति आयोग के सौंपे अपन रिपोर्ट म किहिन हावय के आकांक्षी जिला बीजापुर अउ दंतेवाड़ा म ए अभियान के बहुत अच्छा नतीजे आए हावयं। मलेरिया मुक्त बस्तर अभियान के असर ले बीजापुर जिला म मलेरिया के मामला म 71 प्रतिशत अउ दंतेवाड़ा म 54 प्रतिशत के कमी आये हावय। यूएनडीपी ह ए अभियान के आकांक्षी जिला म संचालित सबले बढि़या अभियान म ले बताइन हावय। ओमन अपन रिपोर्ट म किहिन हावय के मलेरिया ल खतम करे देश के आन आकांक्षी जिला म भी ए रकम के अभियान संचालित करे जाना चाही।

जानबा होवय के बस्तर संभाग ल मलेरिया ले मुक्त करे बर राज्य शासन डहर ले शुरु करे गे मलेरिया मुक्त बस्तर अभियान के व्यापक असर देखे ल मिले हावय। बस्तर क्षेत्र म येकर बेहतरीन परिणाम देखे जाये के बाद ए अभियान के मलेरिया मुक्त छतीसगढ़ अभियान के रूप म पाछु साल के अंत म सरगुजा संभाग म भी क्रियान्वयन करे गिस। राष्ट्रीय स्वास्थ्य मिशन, छत्तीसगढ़ डहर ले चलाए गे दुनो संभाग म ये विशेष अभियान ले मलेरिया के प्रकरण म सरलग कमी आये हावय। अप्रैल-2020 के तुलना म अप्रैल-2021 म सरगुजा संभाग म मलेरिया के मामला म 60 प्रतिशत अउ बस्तर संभाग म 45 प्रतिशत के कमी आये हावय।