केंद्र सरकार के जनविरोधी नीति अउ महँगाई के खिलाफ कांग्रेस ने धरना

अंजोर.रायपुर, 5 जून 2021। केंद्र सरकार के जनविरोधी नीति के खिलाफ पूरा देश म आक्रोश हावय अउ कमरतोड़ महँगाई म मोदी सरकार आम जनता के तरफ ध्यान नइ देके चंद बड़े उद्योगपति के ही ध्यान रखत हावय। इही सब बात ल लेके आज छत्तीसगढ़ म जनता के आवाज़ ल केंद्र सरकार तक पहुँचाये खातिर अखिल भारतीय कांग्रेस कमेटी ह धरना प्रदर्शन करत गोहार करिस। ये मउका म प्रदेश के खाद्य मंत्री अमरजीत भगत ह किहिस के गांधी जी के विचारधारा के अनुरूप शांतिपूर्ण प्रदर्शन अउ सत्याग्रह के ज़रिये हम अपन आवाज़ मोदी सरकार तक पहुँचवात हावन। बेलगाम महँगाई म पहिली ले परेशान आम जनता के तकलीफ़ ल बढ़ावत पेट्रोल, खाद्य तेल अउ राशन के दाम तको सरलग बाढ़त हावय। 

ये ओढ़र म प्रदेश कांग्रेस कार्यकर्ता मन अपन-अपन स्तर म महंगाई के खिलाफ धरना प्रदर्शन करिन येमा प्रदेश अध्यक्ष मोहन मरकाम अपन निवास "बस्तर-वाड़ा" म सांसद श्रीमती छाया वर्मा के संग बइठे रिहिस। उन केंद्र सरकार ले अपील करे हावय के महँगाई कम करे खातिर उचित कदम उठाए। मोदी सरकार के ये सात वर्ष नाकामी बर इतिहास म दर्ज होगे। नोटबंदी, दोषपूर्ण जीएसटी, अनियोजित लॉकडाउन, अंधाधुंध निजीकरण जइसन फइसला ले देश के अर्थव्यवस्था अब तक के न्यूनतम स्तर म हावय अऊ उपर ले महँगाई हर रिकॉर्ड तोड़।