छत्तीसगढ़ म एक संग 22 जिला म 3 हजार 229 जोड़ा के बिहाव ह बनाइस गोल्डन बुक ऑफ वर्ल्ड रिकार्ड

• महिला बाल विकास मंत्री ल गोल्डन बुक के प्रतिनिधि ह सउपिस 3 हजार 229 जोड़ा के सामूहिक बिहाव के वर्ल्ड रिकार्ड के प्रमाण-पत्र

अंजोर.रायपुर, 8 जून 2021। महिला अउ बाल विकास मंत्री श्रीमती अनिला भेंड़िया के उंकर राजधानी स्थित निवास कार्यालय म गोल्डन बुक के अधिकृत प्रतिनिधि श्रीमती सोनल राजेश शर्मा ह छत्तीसगढ़ म एक संग 3 हजार 229 जोड़ा के सामूहिक बिहाव समारोह ल गोल्डन बुक ऑफ वर्ल्ड रिकार्ड म शामिल करे के प्रमाण पत्र सउपिस। ए मउका म छत्तीसगढ़ राज्य महिला आयोग के अध्यक्ष श्रीमती किरणमयी नायक भी उपस्थित रिहिसं।

जानबा होवय के मुख्यमंत्री भूपेश बघेल के उपस्थिति म पाछु 27 फरवरी के छत्तीसगढ़ म पहिली बार 22 जिला म एक संग मुख्यमंत्री कन्या बिहाव योजना ले सामूहिक बिहाव समारोह के आयोजन करे गे रिहिस। सबो जिला के राजधानी रायपुर म आयोजित समारोह ले वीडियो कॉन्फ्रेसिंग के माध्यम ले जोड़े गे रिहिस। राजधानी रायपुर के बलबीर सिंह जुनेजा इंडोर स्टेडियम परिसर म आयोजित समारोह म मुख्यमंत्री श्री बघेल शामिल होके आने-आने जिला के नवविवाहित जोड़ी ले गोठबात करके ओला आशीर्वाद दे रिहिस।

महिला अउ बाल विकास मंत्री श्रीमती भेंड़िया ह ए मउका म किहिन के मंहगाई के समय म कम खर्च म बिहाव के खातिर सामूहिक कन्या बिहाव एक अच्छा योजना हावय। प्रदेश सरकार ह ए योजना के तहत 10 हजार रूपिया के बढ़ोतरी करके 25 हजार रूपिया के प्रावधान करे हावय, इही रकम ले दिव्यांग जोड़ा के खातिर बिहाव के प्रोत्साहन रकम भी 50 हजार रूपिया ले बढ़ाके एक लाख रूपिया करे गे हावय। ये योजना मन के फायदा जादा ले जादा परिवार तक पहुंचे येकर खातिर राज्य सरकार सरलग प्रयास करत हावय।