भारत म अभी लोकतंत्र जिंदा हावय, पश्चिम बंगाल देखा दिस : विधायक शकुंतला साहू

अंजोर.रायपुर,2 मई 2021। पश्चिम बंगाल म चुनई के फइसला आज अवइया हावय अऊ जइसे मतदान के रूझान मिलत हावय लोगन मन जीत के बधाई तको देवत हावय। मिले आरो के मुताबिक तृणमूल कांग्रेस 205 सीट ले आगू हावय। बताये गे हावय के भाजपा अपन पूरा ताकत लगाये के बाद भी बंगाल चुनाव म पिछवात हावय। जबकि चुनई के कमान खुदे प्रधानमंत्री नरेंद्र मोदी जी अउ गृहमंत्री अमित शाह संभाले रिहिस। अभी के शुरूआती नतीजा सिर्फ 83 सीट म ही आगू हावय। 

ये बड़का जीत ले कसडोल विधायक अउ संसदीय सचिव शकुंतला साहू ह बड़ उत्साहित हावय अउ ममता दीदी ल जीत के बधाई देवत सरलग ट्वीट करत हावय। ओमन लिखथे के- ‘भारत म अभी लोकतन्त्र ज़िन्दा हावय, पश्चिम बंगाल देखा दिस’, ‘अइसे लगात हावय के झाँसी के रानी ह अंग्रेज ल युद्ध म हरा दिस’, ‘बंगाल वाले मन अपने राज्य म नफ़रत के दूसरा महामारी ल आये ले रोक लिस।’ 

पश्चिम बंगाल म ममता दीदी के जीत ले देश के राजनीति म कई नवा रंग देखे ल मिलही अइसे आकब हावय। फिलहाल अभी तो देश के आन गैर भाजपाई राज्य के जनप्रतिनिधी मनके बधाई संदेश आते हावय, नतीजा के आधिकारिक घोषणा के अगोरा हावय, बड़ दिन बाद बड़े जलसा तको होही।