अंजोर.रायपुर, 8 मई 2021। छत्तीसगढ़ के कृषि मंत्री रविंद्र चौबे ह रासायनिक उर्वरक म, विशेषकर डीएपी के दाम म प्रति बोरी लगभग 700 रूपिया के वृद्धि करे जाये म चिंता जताये हावय। ओमन भारत सरकार के केंद्रीय रसायन अउ उर्वरक मंत्री ले किसान मन के हित के रक्षा के खातिर रासायनिक उर्वरक कंपनी के ए मनमानी अउ बेतहाशा कीमत वृद्धि म रोक लगाए जाये के गेलौली करे हावय।
मंत्री श्री रविंद्र चौबे ह किहिन के अभी रबी सीजन 2020-21 म डीएपी किसान मन के 1200 रूपिया प्रति बोरी के दर म उपलब्ध कराये गे रिहिस। खरीफ सीजन 2021 म येकर कीमत बढ़ाके 1900 रूपिया प्रति बोरी कर दे गे हावय। ओमन किहिन के बीते एक साल ले कोरोना महामारी के चलत आम लोगन के संग-संग किसान भी परेशान हावय। अइसे स्थिति म डीएपी सहित आन रासायनिक उर्वरक के दाम म वृद्धि के चलत किसान मन ल दोहरा मार पड़ही अउ वो ह खरीफ सीजन के खातिर खाद खरीदे म असहाय हो जाही।
मंत्री श्री चौबे ह किहिन के रासायनिक खाद डीएपी के कीमत म लगभग 58% के एकाएक वृद्धि ले किसान हैरान हावय। अब ये खाद किसान मन ल 1900 रूपिया प्रति बोरी म क्रय करना होही। ओमन किहिन के साल 2020 खरीफ सीजन म डीएपी खाद किसान मन ल 1150 रूपिया प्रति बोरी के दर ले अउ रबी सीजन 2020-21 म 1200 रूपिया प्रति बोरी के दर ले प्रदाय करे गे रिहिस। इही रकम ले रासायनिक खाद एनपीके के दाम म भी प्रति बोरी 565 रूपिया के वृद्धि करे गे हावय। अब ये खाद किसान मन ल 1185 रूपिया प्रति बोरी के जगा म 1747 रूपिया प्रति बोरी देके खरीदना होही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।