सोशल मीडिया के मदद ले अनचिन्हार लाश के सुलझिस गुत्थी, दू आरोपी गिरफ्तार

अंजोर.रायपुर। रायपुर पुलिस कोति ले 7 मई के सोशल मीडिया म माना म एक माई लोगिन के अनचिनहार लाश मिले के फोटा साझा करे गे रिहिस। पुलिस कोति ले चिनहारी बर सोशल मीडिया म पोस्ट करे के सेती ही उंकर पता लघियात लग सकिस अउ संगे-संग आरोपी मनके तको गिरफ्तारी होगे। 

पुलिस कोति ले मिले आरो के मुताबिक रायपुर के थाना माना क्षेत्र म मिले अज्ञात महिला के शव के मामला म दू आरोपी गिरफ्तार सुमित लिमटे पिता स्व. लेखन लाल लिमटे उम्र 37 साकिन दीनदयाल उपाध्याय नगर रायपुर अउ उपेन्द्र यादव पिता स्व. तुलसीराम यादव उम्र 40 साल साकिन आरबीएस कॉलोनी खमतराई के विरूद्ध थाना माना म अपराध क्रमांक 60/21 धारा 304, 201, 34 भादवि. के अपराध पंजीबद्ध करे गे हावय। 

सोशल मीडिया के बने बुता म उपयोग करे म बहुत ही बढि़या परिणाम तको मिलथे, जइसे ये मामला म पुलिस ह महिला अउ आरोपी मन तक पहुंचगे। मामला के खुलासा होए के बाद रायपुर पुलिस ह सबो फॉलोवर मनके आभार मानत जादा ले जादा लोगन ल फेसबूक पेज ले जुड़े बर तको किहिन हावय।