महल ले जादा जरूरी जीव बचाना हावय : नवा बनत राजभवन, सीएम हाउस अउ विधानसभा भवन म सरकार लगाइस रोक

अंजोर.रायपुर, 13 मई 2021। कोरोना संक्रमण के सेती राज्य म उपजे परिस्थिति ल देखत छत्तीसगढ़ शासन ह कम खरचा के खातिर कड़ा कदम उठाये के फइसला ले हावय। जेमा अब नवा रायपुर म बनत नवा राजभवन, विधानसभा भवन, सीएम हाउस, मंत्री अउ वरिष्ठ अधिकारी मन के आवास, नवा सर्किट हाउस के निर्माण बुता म तुरते प्रभाव ले रोक लगे दे गे हावय। ये बुता के भूमिपूजन पाछू 25 नवंबर 2019 के करे गे रिहिस। 

छत्तीसगढ़ शासन डहर ले बीते 26 अप्रैल के सबो विभाग के निर्देश दे गे हावय के पाछू साल के रकम ही वित्तीय साल 2021-22 म भी कम खरचा करे जाए। अब येकर ले भी आगू जाके मुख्यमंत्री भूपेश बघेल के निर्देश म नवा रायपुर म चलत प्रमुख निर्माण बुता म तुरते प्रभाव ले रोक लगा दे गे हावय। 

लोक निर्माण विभाग के प्रमुख अभियंता डहर ले नवा रायपुर म निर्माणाधीन नवा  राजभवन, नवा सीएम हाउस, मंत्री अउ वरिष्ठ अधिकारी मन के आवास, नवा  सर्किट हाउस के निर्माण बुता म तुरते प्रभाव ले रोक के खातिर संबंधित ठेकेदार ल आदेश जारी करे गे हावय। येकर संग ही सेक्टर-19 म नवा विधानसभा भवन के निर्माण के खातिर 245 करोड़ 16 लाख अउ 118 करोड़ के बुता के पहिली म जारी निविदा ल तुरते प्रभाव ले निरस्त कर दे गे हावय।