थिरावथे कोरोना : एक दिन म 71 हजार जांच के छत्तीसगढ़ म नवा रिकार्ड, 10 हजार पॉजिटिव, 153 मउत

अंजोर.रायपुर, 13 मई 2021। छत्तीसगढ़ म 01 मई 2021 के बाद कोरोना संक्रमण के स्थिति म सरलग सुधार होत हावय। तब ले लेके अब तक जिहां रोज नवा मामला म कमी होत हावय, उहें संक्रमण दर भी सरलग घटत हावय। ये 12 दिन म पाजिटिविटी दर 26.1 ले घट करके अब 14 प्रतिशत रहि गे हावय।

अस्पताल मन म सबो रकम के बिस्तर अउ आक्सीजन के उपलब्धता बढ़े के संग रोज होवत मृत्यु म भी कमी आए हावय। ए बीच टेस्ट अउ टीकाकरण म भी तेजी आये हावय। राज्य ह रोज करे जात टेस्ट म नया रिकार्ड कायम करे हावय। 12 मई के एक दिन म 71 हजार 138 ले टेस्ट करे गिस।

छत्तीसगढ़ म बीते 1 मई के जिहां कोरोना संक्रमण के 15 हजार 905 नवा  मामला सामने आए रिहिस, उहें 12 मई के 10 हजार 150 नवा मामला दर्ज करे  गिस। इही रकम ले रोज होवइया मृत्यु के आंकड़ा जिहां 01 मई के 229 रिहिस, उहें 12 मई के 153 लोगन के मृत्यु होइस। 12 दिन पहिली तक राज्य के अस्पताल मन म जिहां खाली बेड उपलब्ध नइ हो पात रिहिस, उहें काली 12 मई के स्थिति म 318 वेन्टीलेटर बेड, 852 आई.सी.यू. बेड, 750 एच.उी.यू. बेड, 6364 ऑक्सीजन बेड अउ 11,883 आन बेड उपलब्ध रिहिस। राज्य म शुरु ले आक्सीजन के कमी नइ रेहे हावय। सुविधा म करे जात विस्तार के सेती अब संभावित कोरोना संक्रमित मनके रोज जांच के आंकड़ा भी बढ़े हावय। 12 मई के राज्य ह 71 हजार 138 लोगन के जांच करके नया रिकार्ड कायम करे हावय।

ए बीच टीकाकरण के मुहिम के व्यवस्थित तरीका ले संचालित करे के खातिर मुख्यमंत्री भूपेश बघेल ह 12 मई के राज्य म सीजी-टीका वेब पोर्टल के शुरुआत करे हावय। ए पोर्टल के शुरुआत होए ले गरीब, निराश्रित अउ अंत्योदय सहित अइसे लोगन भी अपन पंजीयन करा सकही, जेकर पास मोबाइल या इंटरनेट के सुविधा नइ हावय। राज्य के 13 नगर निगम म आज 13 मई ले सप्ताह म सातों दिन चैबीसों घंटा रेपिड एंटीजन टेस्ट के सुविधा शुरु कर दे गे हावय। सैंपल के आरटीपीसीआर जांच सुविधा म करे जात विस्तार के तहत बैकुंठपुर म नवा  वायरोलाजी लैब के शुरुआत करे जा चुके हावय। ए लैब ल मिलाके अब राज्य के दस शासकीय लैब म आरटीपीसीआर जांच के सुविधा उपलब्ध होगे हावय।