अंजोर.गरियाबंद,4 मई 2021। गरियाबंद जिला म अवैध कारोबारी मनके खिलाफ सरलग कार्यवाही जारी हावय। जेकर ले जिला म सरलग अभियान चलाके हीरा तस्कर, अवैध शराब बिक्री, गांजा विक्रेता अउ जुआ, सट्टाबाजी म नकेल कसे हावय। गरियाबंद जिला म पहिली बार 440 नग हीरा कीमती लगभग 50 लाख रूपिया दू आरोपी हीरा तस्कर ले जप्त के कार्यवाही करे गिस हावय। पहिली भी 07 प्रकरण म 672 नग हीरा जप्त करके आरोपी मनला जेल दाखिल करे जा चुके हावय।
पुलिस अधीक्षक भोजराम पटेल ल मुखबीर ले आरो होइस के दू मनखे बहुमुल्य हीरा अपन पास रखके सफेद रंग के होण्डा एक्टिवा म छुरा-फिंगेश्वर मार्ग होवत रायपुर तनि जात हावय। मुखबीर ले मिले आरो के आधार म पुलिस अधीक्षक डहर ले थाना प्रभारी फिंगेश्वर के नेतृत्व म टीम गठित करके नाकाबंदी पाईन्ट लगाये खातिर निर्देशित करे गिस। थाना प्रभारी फिंगेश्वर उप निरीक्षक भूषण चन्द्राकर डहर ले बोरिद चैक (फिंगेश्वर) के पास नाकाबंदी पाईन्ट लगाये गिस अउ छुरा के कोति ले आने वाला वाहन के सघनता ले चेक करे गिस। चेकिंग के बखत होण्डा एक्टिवा म सवार दू मनखे पुलिस ल देखके हड़बड़ा गे अउ भागे लगे, जेला सजगता ले घेराबंदी करके पकड़े गिस।
पकड़े गे (01) सुभाष मंडल पिता गौरंग मंडल उमर 43 साल साकिन वार्ड नं. 55 टिकरापारा भगत सिंह चैक मिश्र सदन रायपुर थाना टिकरापारा, जिला रायपुर (02) उज्जवल चंन्द्राकर पिता पवन चन्द्राकर उमर 30 साल साकिन वार्ड नं. 08 एकता चैक दलदल सिवनी मोवा थाना मोवा जिला रायपुर, दुनों मनखे के तलाशी ले म आरोपी मन के पास ले 440 नग हीरा मिलिस। आरोपी मन ले पुछताछ करे म कोनो वैध कागजात प्रस्तुत नइ करे गिस। जेमा आरोपी मनके विरूद्ध थाना फिंगेश्वर म अपराध क्रमांक 91/2021 धारा 379,34 भादवि, 4(21) माइनिंग एक्ट दर्ज करके दुनों आरोपी ल विधिवत गिरफ्तार करे गिस। आरोपी मन ले मिले 440 नग हीरा, प्रयुक्त दोपहिया वाहन अउ मोबाईल के जप्त करे करिन। मिले आरो के मुताबिक ये कार्यवाही म थाना प्रभारी फिंगेश्वर उप निरीक्षक भूषण चन्द्राकर, प्रधान आरक्षक रणजीत साहू, नेमीचंद पटेल, आरक्षक कृतेश प्रजापति, लक्ष्मीकांत साहू, भूषण निषाद, भोगचंद कश्यप के बुता सराहनीय रिहिन।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।