‘छत्तीसगढ़ महतारी दुलार योजना’ ले कोविड ले अनाथ होए लइका मनके संरक्षण करही भूपेश सरकार

अंजोर.रायपुर, 13 मई 2021। कोविड के खिलाफ लड़ाई के बखत छत्तीसगढ़ सरकार ह एक अइसे फइसला लिस हावय जेन कोविड पीड़ित मनके कुछ आंसू पोंछ सकही। कोविड के निर्मम प्रहार के चलत जेन लइका के सब कुछ छीन गे हावय, अब छत्तीसगढ़ सरकार उंकर संबल बनही अउ न केवल उंकर शिक्षा के दायित्व उठाही बल्कि उंकर भविष्य संवारे के हर संभव कोशिश भी करही। सरकार के ए संवेदनशील पहल ल अमली जामा पहनाये जाही ‘छत्तीसगढ़ महतारी दुलार योजना’ के माध्यम ले। ये योजना ए वित्तीय साल ले लागू करे जाही। 

अइसे लइका जेन अपन माता-पिता ल ये वित्तीय साल के बखत कोरोना के सेती खो दे हावय, उनकर पढ़ाई के पूरा खर्च अब छत्तीसगढ़ सरकार उठाही। संग ही पहिली ले आठवीं तक के अइसे लइका ल 500 रूपिया हरमाह अउ 9 वीं ले 12 वीं तक के लइका ल 1000 रूपिया हरमाह के छात्रवृत्ति भी राज्य सरकार डहर ले दे जाही। शासकीय या प्राईवेट कोनो भी स्कूल म पढ़ई करे म ये लइका छात्रवत्ति के खातिर पात्र होही।

येकर संग ही राज्य सरकार डहर ले ये भी फइसला ले गे हावय के अइसे लइका जेकर परिवार म रोजी-रोटी कमाने वाला मुख्य सदस्य के मृत्यु कोरोना ले हो गे हावय, उहू लइका के पढ़ाई के बेवस्था भी राज्य सरकार डहर ले करे जाही। राज्य सरकार डहर ले ये भी फइसला लिस हावय के यदि ये लइका राज्य म सुरू करे गे स्वामी आत्मानंद इंग्लिश मीडियम स्कूल म प्रवेश बर आवेदन देत हावयं तो ओला प्राथमिकता ले प्रवेश दे जाही अउ उंकर ले कोनो भी रकम के फीस नइ ले जाही।

कोरोना महामारी ह न जाने कितको घर म अंधियार कर दे हावय अउ न जाये कितना लइका के सिर ले उंकर मा-बाप के सहारा छीन ले हावय। मुख्यमंत्री भूपेश बघेल के नेतृत्व म छत्तीसगढ़ सरकार डहर ले जरूरतमंद ल हर रकम के सहारा मुहैया कराये जात हावय। मुख्यमंत्री के ये संवदेनशील पहल ये बेसहारा लइका के बढि़या भविष्य निर्माण म काफी सहायक होही।