ओडिसा ले होवथे अवैध शराब के सप्लाई, सरिया पुलिस पकडि़स गजब अकन दारू के पेटी

 अंजोर.रायगढ़, 7 मई 2021। ओडिशा ब्रांड के शराब बॉर्डर ले पार करके अवैध रूप ले रायगढ़ अंचल म बेचे के आरो पुलिस ले रिहिसे। अधीक्षक संतोष सिंह डहर ले डीएसपी गरिमा द्विवेदी ल निर्देशित करे गिस जेमा थाना प्रभारी सरिया निरीक्षक डी.के. मार्कण्डेय क्षेत्र म मुखबीर अउ स्टॉफ लगाके अवैध शराब के खरीदी-बिक्री के जानकारी ले लिस। 

मिले आरो के मुताबिक ओडिशा बॉर्डर के पास के गांव अमलीपाली म रहइया संतोष पटेल शराब माफिया के रूप म उभरे हावय, आसपास के क्षेत्र म उड़ीसा ब्रांड के शराब अवैध रूप ले सप्लाई करत हावय अउ आज भी बिहनिया एक छोटे हाथी पिकअप वाहन म अवैध रूप ले शराब चन्द्रपुर तनि ले जाए जाये के सूचना रिहिस। सूचना म कार्यवाही के खातिर टीआई मारकंडे संग प्रधान आरक्षक कृष्ण कुमार गुप्ता, प्रधान आरक्षक श्रीराम साहू, आरक्षक खीरेंद्र जलतारे, मुकेश साहू, अशोक पटेल के टीम सूखापाली मार्ग बोदा तिराहा के पास ओडिशा तनि ले बिहनिया करीब 7:30 बजे तिराहा के पास पहुंचे गाड़ी ले मेकडावल नं 1 अंग्रेजी शराब 48 पाव, इम्प्रेरियर ब्लू रायल स्टेज के 19 अध्धी अउ 07 काटुन म 84 नग बीयर बाटल जुमला 70.365 लीटर शराब कीमती 23,670 रूपिया दुनों आरोपी मन ले जप्त करके थाना लाये गिस। 

गिरफ्तार दुनों आरोपी चुलेश्वर सिदार पिता विमलेश्वर सिदार 19 साल निवासी रिसोडा थाना सरिया अउ तोरोनी सारथी पिता तुलसी सिदार निवासी बिरजुपाली  थाना अम्बाभाना जिला बरगढ़ ओडिशा ल रिमांड म भेजा गे हावय। पुलिस पार्टी आरोपी संतोष पटेल के घर अमलीपाली म दबिश दीस फेर ओ फरार हावय। फरार आरोपी संतोष पटेल अउ गिरफ्तार दुनों आरोपी मन के विरुद्ध थाना सरिया म अप.क्र.78/2021 धारा 34(2) 59(क) आबकारी एक्ट अउ 109 IPC के कार्यवाही करे गिस।