अंजोर. अम्बिकापुर, 8 मई 2021। जिला कलेक्टर के निर्देश के मुताबिक प्रशासनिक अमला गवई म शादी-ब्याह, दशगात्र, छठी अउ आन सामाजिक कार्यक्रम म कोविड गाइडलाइंस के पालन सुनिश्चित करे बर सरलग मॉनिटरिंग करके कार्यवाही करे जात हावय। नियम के पालन नइ करे म सामान जप्ती अउ चालानी कार्यवाही करे जात हावय। एसडीएम अम्बिकापुर ह बताइन के 6 मई के अम्बिकापुर जनपद म आने वाला गांव पंचायत सोनबरसा, टपरकेला, लक्ष्मीपुर, सकालो, श्रीगढ़, रजनीपुरी खुर्द अउ भकुरा म बिहाव कार्यक्रम के निरीक्षण करे गिस।
बिहाव आयोजन म जादा संख्या म मेहमान होए के सेती टेंट जब्ती, डीजे जब्ती करके जुर्माना लगाये गिस। येकर संग ही कार्यक्रम आयोजन म जादा लोगन के शामिल नइ करे समझाईश दीस गिस। कलेक्टर श्री संजीव कुमार झा ह अपील करत किहिन के शादी-विवाह, छठी या कोनो भी आन मांगलिक कार्यक्रम ल घरेलू स्तर म निपटाएं। कोनो भी कार्यक्रम म 10 ले जादा मनखे मन शामिल नइ करें। कोविड महामारी के दौर म गांव म कोरोना के प्रसार के मुख्य कारण इही हावय। सबो लोगन ल जिम्मेदार नागरिक होए के परिचय देना हावय। कोरोना संक्रमण के प्रसार ल रोके के खातिर आप सबके सहभागिता जरूरी हावय।
इही रकम ले एसडीएम ह सबो टेंट, डीजे अउ आन कार्यक्रम संचालक ले अपील करे हावय के कोनो भी रकम के सामाजिक कार्यक्रम म भाग नइ लें अउ अपन सामान ल किराए म नइ दें। कोरोना संक्रमण ले बचाव के खातिर आप सबके भागीदारी जरूरी हावय। कोविड गाइडलाइंस के पालन नइ करे म कार्यवाही करे जाही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।