अंजोर.रायपुर, 13 मई 2021। लोक स्वास्थ्य अउ परिवार कल्याण अउ चिकित्सा शिक्षा मंत्री श्री टी.एस. सिंहदेव ह आज कोरबा जिला मुख्यालय म कोरोना सैंपल मनके आरटीपीसीआर जांच के खातिर वायरोलॉजी लैब के ऑनलाइन शुभारंभ करिन। ए नवा लैब ल मिलाके अब प्रदेश के 11 शासकीय लैब म आरटीपीसीआर जांच के सुविधा हो गे हावय। कोरोना संक्रमित मनके पहचान के खातिर प्रदेश म सरलग सैंपल जांच के संख्या बढ़ाये जात हावय। येकर सुदृढ़ बेवस्था के खातिर नवा आरटीपीसीआर जांच केंद्र अउ ट्रू-नाट लैब के स्थापना करे जात हावय।
प्रदेश म पाछु दू हफ्ता म चार नवा वायरोलॉजी लैब शुरू होए हावयं। ए बखत महासमुंद, कांकेर अउ कोरबा के नवा मेडिकल कॉलेज के संग ही कोरिया जिला मुख्यालय बैकुंठपुर म आरटीपीसीआर जांच के सुविधा विकसित करे गे हावय। कोरबा म वायरोलॉजी लैब के वर्चुअल लोकार्पण कार्यक्रम म स्कूल शिक्षा अउ जिला के प्रभारी मंत्री डॉ. प्रेमसाय सिंह टेकाम, राजस्व मंत्री जयसिंह अग्रवाल, सांसद श्रीमती ज्योत्सना चरणदास महंत, विधायक पुरूषोत्तम कंवर अउ मोहित केरकेट्टा अउ महापौर राजकिशोर प्रसाद भी शामिल होए रिहिन।
स्वास्थ्य मंत्री श्री टी.एस. सिंहदेव ह लोकार्पण कार्यक्रम के संबोधित करत किहिन के अब कोरबा म ही आरटीपीसीआर जांच के सुविधा शुरू होए ले संदिग्ध मरीज मन के जांच अउ कॉन्टैक्ट-ट्रेसिंग म तेजी आही। लोगन ल रिपोर्ट भी जल्दी मिले लगही। एम्स रायपुर, छह जुन्ना अउ तीन नवा मेडिकल कॉलेज अउ बैकुंठपुर वायरोलॉजी लैब ल मिलाके अब प्रदेश म कुल 11 जगह म आरटीपीसीआर जांच के सुविधा हो गे हावय। कोरोना संक्रमण के शुरूआत के समय हमर पास एक भी वायरोलॉजी लैब नइ रिहिस।
श्री सिंहदेव ह बताइन के जशपुर, जांजगीर-चांपा, बलौदाबाजार, दुर्ग अउ दंतेवाड़ा म भी वायरोलॉजी लैब की स्थापना के खातिर कार्यादेश हो गे हावय। राज्य शासन ले बालोद अउ मुंगेली म भी येकर स्थापना के अनुमति मिल गे हावय। कोशिश होही के ये सबो लैब जल्दीी ले जल्दीह शुरू हो जाएं। वायरोलॉजी लैब ले कोरोना संक्रमण के बढि़या जांच कम समय म ही स्थानीय स्तर म हो जाही। नवा लैब ले कोरोना संक्रमित के पहचान अउ ओला समय म उपचार उपलब्ध कराये म तेजी आही।
स्कूल शिक्षा मंत्री अउ कोरबा जिला के प्रभारी डॉ. प्रेमसाय सिंह ह ऑनलाइन लोकार्पण कार्यक्रम म किहिन के कोरबा म वायरोलॉजी लैब के बहुत जरूरत महसूस करे जात रिहिस। जांच के खातिर सैंपल रायगढ़ भेजे जाये ले रिपोर्ट मिले म देरी होत रिहिस। अब ये समस्या नइ होही।
कोरबा लोकसभा क्षेत्र के सांसद श्रीमती ज्योत्सना चरणदास महंत ह वर्चुअल लोकार्पण कार्यक्रम म किहिन के सबो के सहयोग ले इहां विकसित होत स्वास्थ्य सुविधा ले आने वाला समय म कोरबा प्रदेश के सबले सुरक्षित अउ स्वस्थ जिला बनही। लैब के शुरू होए ले कोरोना संक्रमण के जांच, रोकथाम अउ रोकथाम म तेजी आही। ओमन कोरबा अउ कोरिया म वायरोलॉजी लैब के स्थापना के खातिर स्वास्थ्य मंत्री श्री टी.एस. सिंहदेव के धन्यवाद दिस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।