बड़ मनके बड़े बात.... तहसीलदार, जनपद सीईओ अउ बीईओ ल सिरिफ नोटिस, छोटे कर्मचारी होतिस त हो जतिस निलंबित

अंजोर.कोण्डागांव, 20 अप्रैल 2021। जिला म कोरोना संक्रमण ले बचाव बर आने-आने प्रयास जिला प्रशासन डहर ले करे जात हावय। जेकर खातिर प्रशासन के सबो कर्मी मन के मास्क नइ लगइया मनखे मन म कार्यवाही अउ टीकाकरण के प्राथमिकता देते ये बुता के सुचारू सम्पादन के निर्देश दे गे रिहिस, फेर विकासखण्ड बड़ेराजपुर ले मास्क नइ पहिनइया लोगन म कार्यवाही अउ मास्क पहने के खातिर प्रोत्साहन अउ कोविड टीकाकरण अभियान म शासन के अपेक्षानुरूप बुता नइ करे जाये म तहसीलदार बड़ेराजपुर, सीईओ जनपद पंचायत बड़ेराजपुर अउ खण्ड शिक्षा अधिकारी बड़ेराजपुर के कलेक्टर पुष्पेन्द्र कुमार मीणा डहर ले कारण बताओ नोटिस दे गे हावय अउ ओमन ल तीन दिवस के भीतर अपन जवाब प्रस्तुत करे के समय दे गे हावय। जवाब प्रस्तुत नइ करे जाये के स्थिति म संबंधित के विरूद्ध अनुशासनात्मक कार्यवाही करे जाही।

बड़ मनके बड़े बात.... तहसीलदार, जनपद सीईओ अउ बीईओ ल सिरिफ नोटिस दे गे हावय। अउ कहू इंकर अलावा छोटे कर्मचारी होतिस त तुरते निलंबित हो जतिस। सरकार म अइसन कई पइत देखे जाथे के बड़का अधिकारी मन ल सिरिफ कारण बताओं नोटिस जारी करके मउका दे जाथे अउ छोटे ऊपर तुरते कार्यवाही हो जथे। 

जानबा होही पाछू अनुविभागीय दण्डाधिकारी रामानुजगंज कोति ले ग्राम पंचायत चुमरा अउ रामचन्द्रपुर प्रवास के बखत ग्राम पंचायत चुमरा के सचिव रामगहन गुप्ता अउ गांव पंचायत रामचन्द्रपुर के सचिव बालदेव यादव मुख्यालय म नइ पाये गिस अउ फोन लगाये म उंकर डहर ले फोन नइ उठाये गिस। अउ पंचायत सचिव डहर ले कोविड-19 टीकाकरण म सहयोग अउ ग्राम पंचायत स्तर म कोरोना वायरस ले बचाव के उपाय के प्रचार-प्रसार नइ करे के सेती छत्तीसगढ़ पंचायत सेवा अनुशासन अउ अपील नियम 1999 के नियम 4 के तहत पंचायत सचिव रामगहन गुप्ता अउ बालदेव यादव ल तत्काल प्रभाव ले निलंबित करे गे हावय।